Imphal, Nailur 11: Ka jingpakhang surok kaba khlem buh por jong ka United Naga Council (UNC) ka la pynthut ia ka leit ka wan jong ki mar ki mata ba kongsan bad ka la wanrah ruh ia ka jingkyrduh umphniang kaba jur ha Imphal.
La iathuh ba ka don ka jingkulmar ha ki surok National Highway 2 bad 37.Ha Noney district, la kynnoh ba la kawang maw ia kawei ka kali kit umphniang bad kiwei kiwei ki trok kit mar kiba iaid hapoh ka jingsynran jong ki bor pahara.
La iathuh ba ki nongkyrshan ia ka jingkhang dam, ki la buh ia ki maw ha surok bah Imphal–Jiribam bad ki la thang ia ki tyre kali hajan ka jingkieng Noney.Katto katne tylli ki trok kit mar ki dang sahkut ha Noney Bazar bad ha Khumji.Ki dukan bad ki jaka khaii ha Longmai Bazar ruh ki la khang khyrdep ha kane ka sngi Palei.
Ki Rapid Action Force bad ki CoBRA la buh ha ki jaka bad ba donkam bha ha Noney.Ki bor pahara ki dang pynlong ia ka jingpahara kaba jur ban iada na ka jingjia kaba kham jur bad ban iada ia ki kali kit marbam.
Ka UNC ka la pynjari ia katei ka pakhang surok naduh ka por 1 baje mynstep jong ka 9 tarik u Nailur.Ka dawa ia ka hok bad ka jingkitkhlieh halor ka jingshah pyniap bad shah pynmong ia ki 6 ngut ki shynrang Liangmai Naga ha ka 13 tarik u Jymmang.
La pyllait ia ki kali kiba kit ia ki tiar sumar bad kiba iadei bad ki lad pathai khubor, ka bor ding, ka um bad ki telecommunication.
Katba ki jingdawa ki nang kiew na ka bynta ka jingpahara kaba man ka por na ka bynta ki kali kit marbam ba donkam.Katto katne ki jingkynnoh halor ka jingdonkti jong ki kynhun lehnoh bad ki riew pawkhmat ha ka sain pyrthei ruh ki la mih.Hynrei ia kine ki jingkynnoh ym shym la lah ban pynshisha da kaba laitluid bad ki donkam ia ka jingtohkit kaba khlem shah liang.
Ka jingpakhang ka la pynmih thymmai ïa ki jingkylli halor ka jingpyntreikam ïa ka nongrim ba la pynpaw da ka Ïing dorbar Manipur ba ym dei ban shah ïa kano kano ka jaitbynriew ban khanglad ïa ki marbam ba kongsan.
