Shillong, Jymmang 19 : Bun tylli ki dukan fast food bad dukan bam kila shah pynjulor ha ka kynhun ki runar hynne ka janmiet sngi Thohdieng, ha Khyndai Lad, Police Bazaar.
Kane kala jia tang shisngi hadien ba uwei u Nongniah taxi bad u paralok, kila shah shoh ha ka kynhun ki bar jylla hynnin ka miet sngi Palei ha Khyndailad. Hynrei, ia kine ki runar baroh la ioh ban kem noh da ki Pulit ka Jylla tang hapoh ka 24 kynta na Guwahati.
Halor ka jingpynjulor ia ki dukan marbam, watla ym lah ban tip ia ki daw, la suba jur ba ka lah ban don ka jingiadei bad ka jingjia hynnin ka miet.
Ha kajuh ka por, ka Taxi Drivers Welfare Association kala weng noh ia ka jingiakhih da kaba sangeh kamai hadien ka jing shimkhia ki Pulit ban kem ia ki runar ba donkti ban shoh ia une u nongniah taxi.
