Nongpoh, Jymmang 29: Kawei ka samla lud kaba don jingduna ha ka bor iohsngew bad lait kren ka la shah leh beijot ha kawei ka jaka khlaw kaba don ha ka shnong kyndong ha Ri Bhoi District.
Halor katei ka jingjia, ki pulit ka Ri Bhoi District ki la ioh ban kem noh ia uwei napdeng kiba kynnoh donkti ban leh ia kane ka kam bymman.
Katkum ka khubor Pulit, la iathuh ba kane ka jingjia ka la jia ha ka 25 tarik Jymmang 2025. Ki iathuh ba ki riew bymman kila bat jubor ia kane ka samla lud ha ka jaka khlaw kaba don ha kawei ka shnong kyndong ha Ri Bhoi District.
Ki iathuh ba kane ka samla kala iakhun bad ioh ban phet na ka tyrsim jong kine ki runar bad kala poi iaid ruma hapdeng ka jinglong lyngkhuid sha ka jaka sah jong ki bahaiing, kiba la pyntip noh mar mar sha ki Kmie Kpa jong kane ka samla.
Na ka liang ki bahaiing kila leit sha katei ka jaka ba jia kane ka jingjia da ka jingialam lynti kane hi ka samla bad ha kane ka jaka, ki bahaiing kila lap ia kawei ka mobile phone jong uwei na ki nongleh bymman bad ia ki jain phong jong kane ka samla. Hadien kane, kila pyntip noh mar mar sha ki Pulit ka Ri-Bhoi District ba kin leh ia kaba donkam.
Ki Pulit kila pynlong ia ka jingtohkit kaba jur bad kila iohkem noh ia uwei na kiba la kynnoh donkti.
