Gangtok, Jymmang 17 : Lai ngut ki Heh ka State Bank of Sikkim (SBS) kila shah kynnoh ba kila bam klop ia ka pisa ba kot haduh T.69 klur na ka Bank.
Ka SBS kala ujor da ka ejahar pyrshah ia kine ki laingut ki Heh ba kynthup ia u Dorjee Tshering Lepcha uba dei u General Manager (Operation), u Tsewang Dorjee Lepcha uba dei u Assistant Manager (IT) bad u Tilak Rai uba die u Senior Accountant Assistant.
Baroh kine ki laingut ki dei kiba dei hapoh ka Headquarter jong ka SBS kaba don ha Gangtok. Baroh kila shah kynnoh ba kila iasuhbuit lang ban tuh ia ka pisa jong ka Bank na ka bynta ki jingmyntoi shimet.
Hadien ba ka Bank kala pynlong ia ka jingtohkit, kila lap ia ka jingleh thokha kiba bun ki Account kynthup ia ka account nombor 2811100148000030 kaba dei ha ka kyrteng jong u Assistant Engineer ka Roads & Bridges Department, ka Sorkar Sikkim, ka Account nombor 2811100140225661 ha ka kyrteng ka Chung Chung Bhutia, kurim jong u Dorjee Tshering Lepcha.
Ka Bank kala kyrpad ia ka CID ba kan kurup lut ia baroh ki jingdon jingem jong kine ki Heh ka Bank lem bad ki bahaiing hasem jong ki.
Ia kane ka case la register hapoh ki kyndon jong ka Indian Penal Code bad ka Information Technology Act, 2000.
