Guwahati, Nailur 11 : Ki Myntri Rangbah (CM) jong baroh ki phra tylli ki jylla ka thain shatei lammihngi (Northeast) kila shah khot sngewbha ha ka sorkar Bangladesh na ka bynta ban wan jngoh sha kane ka ri
Kane ka jingkhot sngewbha ka long ruh shibynta ban nang pynkhlain ia ka jingiadei hapdeng ka Bangladesh bad kane ka thain Northeast India. Ia kane la pyntip da u Myntri kam bar ri ka Bangladesh u Shahriar Alam.
Kine ki CM ka Northeast kila shah khot sngewbha na ka bynta ban pynlong ka jingwan jngoh kaba lai sngi kynthih ha ka sorkar Bangladesh.
Ka Bangladesh bad ki katto katne ki jylla ka thain Northeast kila dep don lypa ia ka jingiadei kaba jan ha kaba iadei bad ki kam khaii pateng ha ki thain khappud bad ka jingpyniadoh lyngba ki lynti iaid.
Ka Bangladesh bad ka thain Northeast India ki iasam ia ka jaka khappud kaba 1879- kilomitar hapdeng jong ki.
Ha u bnai Iaiong mynta ka snem, ka Bangladesh kala shah ia ka India ba kan pyndonkam ia ki artylli ki kad jhad ba kongsan, kata ka Mongla bad ka Chittagong ports.
Na ka liang ka India kala dep ruh ban pyrshang pynkit mar lyngba ka jhad na ka jylla ka thain Northeast lyngba ka kad jhad na Chittagong hapoh Bangladesh.
Lah ban kdew ba ka Myntri Rangbahduh (PM) ka Bangladesh, ka Sheikh Hasina dang shen ka dang shu pynkut ia ka jingwan jngoh ka jong ka sha India.
