Itanagar, Nailar 18 :U Principal in-charge jong ka skul Kendriya Vidyalaya (KV) ha Upper Subansiri district, u la shah kem noh halor ka jingshah kynnoh jrong kti ia khyndai ngut ki khynnah kynthei jong kane ka skul.
Kane ka jingjia ka la paw pyrthei hadien ba kine ki lanot kila iathuh ha la ki jong ki kmie ki kpa ha kane ka sngi ba Ar ba la lah.
Ki Kmie Kpa kila leit ujor da ka ejahar pyrshah ia une u Principal ha Daporijo police station ha kaba ki Pulit kila register case pyrshah ia u hapoh ki kyndon ain 354 IPC R/W 7 POCSO Act. Une u Principal u dei uba la tip kyrteng u Akhileshwar Singh.
Une u principal mynta u la don hapdeng ka jingshah set ha ki pulit.
U Officer Incharge kane ka thanad u Token Dubi ula iathuh ba ki Pulit kila dep ban buh jingthoh ia ka jingphla jong kine ki Khynnah bad ka jingtohkit mynta ka la iaid shakhmat.
Kine ki khynnah skul ki la kynnoh ba une u nonghikai barabor u ju ktah ia ki met ki phad jong ki kumjuh ia ki bynta ba kyrpang ha ka por ba dang long skul, kata wat hadien ba ki la ialeh pyrshah.
Kawei na ki lanot ka la ong ba kila phla ia kane ka jingjia hakhmat ki kmie ki kpa jong ki hadien ka jingai jingmut da kawei pat ka nonghikai jong kane ka skul.
Dei halor kane, na ka liang ki kmie ki kpa bad bad kiba haiing hasem ki la leit ban ujor pyrshah ia u Singh hapoh Daporijo police Station. Ki kmie ki kpa jong kine ki lanot kila dawa ruh ba dei ban pynshitom da kaba tyngeh ia une u runar.
