Tura, Nailar 18: Kawei ka samla lud ba dang 19 snem ka rta kala duh noh iala ka jong ka jingim na ka jingshah lympat ha ka bording elektrik ha Ri-lum Garo.
Kane ka jingjia kala jia hynne ka sngi palei ha ka thain Nangalbibra, South Garo Hills District bad ia kane ka samla lud la tip kyrteng da ka Suritha N Sangma.
Kat kum ka khubor ba ioh, la iathuh ba kane ka samla kala shah lympat bording ha ka por ba ka dang kit ia ki symbai marrep ban leit thung sha ka kper lajong.
La ong ba kane ka samla kala kum iatyngkhuh bad u waiar bording jong ka MeECL uba la noh jan ryngkat rynieng briew ha kane ka jaka.
Ki paidbah haba ioh jingtip ia kane ka jingjia, kila leit jngoh bad kila bitar puk ia ki bor khmih ka MeECL haba kynnoh ruh ba ka dei ka kam kheinsting jong kane ka Tnad ka bym shym la leh eiei ia une u waiar bording uba la noh jankot madan bad buh jingma ia ka jingim ki briew.
Hynrei ki bahaiing hasem jong kane ka Samla kila shu iam paitdohnud hala marwei bad rai ban nym ujor ejahar satia sha ki Pulit ne ai mukotduma pyrshah ia ka Tnad Bording watla ki dak ki shin ki paw shai ia ka jingkhein sting jong ka Tnad kaba la wanrah ia ka jingiap jong kiba bun ngut ki briew manla u snem ha Ri-lum Garo na ka jingshah lympat bording.
Dang ha ki khyndiat snem, iwei I Khynnah ila lait im salit na ka jingshah lympat bording hynrei ila hap duh noh ia baroh artylli ki kti namar ka jinghap ot noh na ka daw ka jingmynsaw kaba jur.
Watla Iingakshari kala hukum ia ka Tnad ba kan siew bai lutksan ia ine I Khynnah hynrei kam shym la don satia kata ka jingshimkhia na ka Tnad ban leh eiei ia kane ka jingkhein sting khnang ban kut noh ka jingshim ia ki mynsiem briew.
