Gossaigaon, Rymphang 22 :Ki pulit ka Assam ki la ioh ban kem noh ia hynriew ngut ki dkhot jong ka kynhun kieng atiar kaba dang shu seng thymmai ka Greater Kamtapur Liberation Organisation (GCLO) ha ka jingleit khynra ha ka por mynmiet ha ki bynta jong ka Gossaigaon ha Assam.
Ia kine ki suba dkhot ka GCLO kiba la shah kem noh la ithuh kum u Sanjeev Roy, Gautam Rai, Uttam Roy, Manoj Roy, Abhijit Vashisht bad u Dipesh Roy.
Kham hashwa kane ka kynhun kieng atiar ka la pyllait ia ka video kaba pynbna alor ki jingdawa bad halor ka jingthaw ia kane ka kynhun.
Ha kane ka video la iohi ruh ia u Rajdeep Koch uba dei u Assistant General Secretary jong ka kynhun uba la byrthen ban pyndonkam da ki tiar ialeh na ka bynta ban pynurlong ia ka jingdawa ban ioh la ka jong ka jylla Kamtapur.
Hadien ka jingpyllait ia katei ka video, na ka liang ki bor pulit ka jyll ki la pynlong ka jingkhynra ban ioh kem ia kine ki dkhot jong katei ka kynhun.
