Pynkhreh ka NYC ia ki Hynniew ngut ki samla kynsai sha ka rynsan ha Guwahati
Nongstoiñ, Naiwieng 29: Ka seng Nongstoiñ Youth Calisthenic, kaba dei kawei na ki kynhun kaba pyniaid ïa ki jingïalehkai kilan met, ha ka 2 tarik u Nohprah 2023 kan ïoh ban pynlong ïa ka jingïakilan met kaba kyrpang, kum shi bynta ban jied ïa ki 7 ngut ki khynnah kiba tbit bad kiba kham kynsai, ban phah sha ka lympung kaban pynlong ha nongbah Guwahati ha ka 9 tarik u Nohprah 2023.
Ïa katei ka jingïalehkai kilan met yn pynlong ha rud ka wah Nondeiñ bad ka jingmih shakhmat jong kitei ki samla ban seng ïa katei kynhun, ka la wanrah shisha ïa ka jingmyntoi bad ban ai mynsiem ruh ha ka imlang sahlang, khamtam ba ki para samla kin ïohi ïa ka nuksa babha ba kin ïoh ruh ban lait na ki jingdih pynbuaid, khamtam eh na u drok.
Uwei na ki dkhot jong ka kynhun NYC, ula shah khot ban leit ialehkai ia ka Gymnastic ha Guwahati. Une u samla u dei u ba la tip kyrteng kum u Mebanrilang Lyngdoh Marshillong, 17 snem ka karta.
U samla Mebanrilang u dei u khun jong I kong Rijoylin bad jong u bah Bankhraw Kupar Lyngdoh Marshiangbai, kiba dei ruh kiba shong basah ha ka shnong New Nongstoiñ ha ka kyntoit kaba la tip kum ka Mawlarshong.
La ong ba hadien ba ki katto katne ngut ki paralok jong u kiba ju ïalehkai lang ki la ring kai da ka video bad ki upload ha ki social media. Hynrei ki la kyndit ba ka la long viral pynban kata ka video kaba u la lehkai Calisthenic bad dei na kata hi ka daw la don ba phone ïa u bad ba u la shah khot.
Ki paralok kiba ju ïalehkai lang kila pynpaw ïa ka mynsiem ka jingsngew kmen ba uwei na ki dkhot jong ki u la shah jied bad ka la long ka burom ïa ka seng NYC, ong u president katei ka seng Nongstoiñ Youth Calisthenic kata u samla Aiborlang Marshillong.
U la ïathuh ba la seng ïa katei ka kynhun naduh u snem 2020 bad ma u haba u ïohi ïa ki para samla ba ki long kiba smat ba sting, ka la pynlong ia u ba un kyrshan radbah ïa katei ka seng kum shi bynta ban ai mynsiem bad mynta ïa katei ka seng la tip noh kum ka West Khasi Hills District Calisthenic.
U la ong ba wat haba ka dei ka kynhun kaba danglung bad kaba rit, pynban ka jingshah khot uwei na ki dkhot jong ki ka la long shisha ka burom ïa ka seng bad ïa ka thaiñ hi baroh kawei.
