Shillong, Naiwieng 29: Namar ka jingsniew shaba palat jong ka surok Shillong-Dawki khamtam ha ki thain Pynursla, ka Sorkar Jylla mynta kala bthah ia ka NHIDCL ba kan maramot noh mardor ia kane ka surok kaban iaid ryngkat ryngkat bad ka jingpyntrei ia ka surok ba thymmai.
U Myntri Rangbah ka Jylla Conrad K Sangma ula ong ba ki(NHIDCL) la iohi ia ka jingsniew jong ka surok bad kila dei ban pynbeit noh wut wut ha kaban pynthikna ba ka jingmaramot ka dei ban iaid noh shaid shaid khamtam ha ki thain kiba marjan ka Dawki kiba la dei ban sdang noh mardor.
“Ka NHIDCL kala pynthikna ia ngi ba kin sa sdang noh ia ka jingmaramot hapoh kine ki khyndiat sngi ban wan bad kila kular ba kin shna bha ia ka surok haba maramot” ula ong.
U Myntri Rangbah ula pyntip ruh ba ia ka song ba nyngkong (first package) jong ka surok la dep ban aiti sha ka kompani ba kan pyntreikam. Ki Contractor ia kaba la aiti ia ka kam, la khmih lynti ba kin sa sdang noh shen ia ka kam.
U Conrad u pyntip ba ki contractor kila wanrah ia ki kor ki bor bad ki nongtrei sha ka thain bad la khmih lynti ba ha ka taiew ban wan lane hapoh 10 sngi, yn dang wan shuh shuh ki nongtrei bad ki kot ki bor.
