Shillong, Naitung 21 : U Samla Cardonald Thangkhiew ba ju khot ha rynsan tem kum u DJ Cardo, ula shah jied ban iakhun ha ka DMC DJ Battle World Championship, India National Final, ka ban long ha Mumbai ha ka 6 tarik u Nailur, 2026.
U Samla Cardo uba la kha ha Mawlai Umthlong, Shillong, u dei uba la jop teng ia ki DJ Battle Competition ba kynthup ia ka Northeast DJ Battle Season 1 (2024) kaba long ha Itanagar bad ka DMF DJ Battle (2019) ha Meghalaya.
Une u samla ula wan ruh ha ka kyrdan ka ba-ar ha ka 18 Degrees Festival (2019) bad DJ Battle Jowai (2022, 2023).
U DJ Cardo un hap iaknieh ia ka nam lahduh pyrshah ia kiwei pat ki DJ kiba la poi sha ka final-u DJ Raazid na Nagpur, DJ H12 na Bombay,DJ Karan B na Delhi, DJ Johney na Bombay, bad DJ Reaction na Kolkata.
Haba iakren bad ka Shlem, u DJ Cardo ula pyntip ba ula sdang iaid ha kane ka lynti ban long u DJ naduh u snem 2015 bad kaba khring ia u ban poi sha kane ka lynti ka dei lyngba ka jingsngap ia ki jingrwai kiba kynthup ia ka HipHop, Trap Music, Dubstep bad ki EDM Music.
U iathuh ba ki DJs kiba u ju peitkhmat bha bad kiba pynshlur ia u ki kynthup ia u DJ Q-bert, DJ Angelo, DJ Craze bad kiwei ki DJs kum U skrillex bad Avicii.
“Ng la sdang ban tem naduh u snem 2016 bad nga la trei shitom hadien ba nga iohi ia ka DMC DJ Battle kaba dei kawei na ki competition ba heh tam jong ki DJs kaba la tip ruh kum ka Olympics Of DJing lane Olympics Of DJ Battling” ula ong.
Ia kane ka DMC World Championship la sdang naduh u snem 1985. Ha kane ka jingiakhun la wan iashim bynta da ki Djs na kylleng ki ri jong ka pyrthei.
Ha kane ka jingiakop ban long ha Mumbai, baroh ki DJs ki dei ki Turntablist kaba mut ba ki hap ban tem da ki Turntable Players. Lyngba ka jingiohi ia ka sap, ka jingstad bad ka jingaiti lut jong ki nongiashim bynta, kala pynshlur ia u samla Cardo ban bud ia ka kam DJ bad ban bteng ban pynjanai ia la ka sap.
“Nga ainguh ia u Blei ba ula ai ha nga ia kane ka sap bad ruh ia I Mei I Pa bad ki Hynmen ki Para kiba la ai mynsiem ia nga. Ka long ruh ka burom kaba khraw ia nga ban ioh ban iashim bynta” ula ong.
