Gangtok, Nailur 21 :U khlur ialehkai football barim ka India u Bhaichung Bhutia hynnin ka sngi ba Ar ula shah jied kum u president ba thymmai jong ka Hamro Sikkim Party (HSP).
U Bhaichung Bhutia ula shah jied kum u president ba thymmai ka Hamro Sikkim Party (HSP) da baroh ki nongialam bad ki nongtrei ka party khlem da don kano kano ka jingia aireng.
Kane ka jingshah jied jong u Bhaichung Bhutia kala long hapoh ka national conference jong ka HSP kaba la long ha Gangtok hapoh Sikkim.
“Mynta u Bhutia un ialam ia ka HSP ha ka jingialeh ban rat dyngkhong ia ki kam bamsap jong kane ka sorkar kaba mynta hapoh Sikkim bad ban pynioh pat ia ka Sikkim da ka sorkar kaba khuid bad kaba phaikhmat sha u paidbah,” ong u general secretary ka HSP, u Biraj Adhikari.
Ha u bnai Jymmang 2018, une u khlur ialehkai barim u Bhaichung Bhutia ula thaw ia ka party thymmai ba la tip kum ka Hamro Sikkim Party (HSP).
Ha ka assembly election kaba la long ha u snem 2019 ha Sikkim kaba don 32 tylli ki constituency, ka HSP kala pynieng kyrtong ha ki 23 tylli ki constituency.
Hynrei, watla katta baroh ki kyrtong jong ka Humro Sikkim Party (HSP) kila shah rem ha kane ka ilekshon bad ioh tang 1.76% ki vote lane kham duna na kawei pa kawei ka constituency.
