Tura, Rymphang 26 : U Kyrtong ka NPP bad MLA ka Bajengdoba Pongseng Marak, ula shah thombor ha ki paidbah ha ka miet sngi saitjain namar ka jingwan rung sha kawei ka Shnong hadien bala kut ka por ialap elekshon bad kane ka jingthombor kala wan jia namar ka jingsuba ba u wan ban khroh vote da ka bor pisa bad ka kyiad.
Ki paidbah ba don kumba 500 ngut eiei kila khang kdong ia ki kali (convoy) jong une u MLA katba ki dang rung sha ka shnong ha Bajengdoba bad ki khlem ailad shuh ban mih.
Ki paidbah kila tohkit jur ia ka jingwan rung jong u sha ka shnong bala tip kum ka Songmegam, kaba jngai kumba 10 Km na Bajengdoba Block Office bad namar ka jingshai ka jubab, don katto katne ki paidbah kila dawa ban pynjulor lut tia ki kali bad ban wiang ding ia ki bad don ruh kiwei kiba byrngem ban shu lynthem noh da ki maw.
Ki bor District haba ioh jingtip ia kane ka jingjia, kila phah ia ki bor Pulit lem bad ki kynhun pyniaid elekshon na Bajengdoba Police Station, sha katei ka jaka ban tehlakam ia u paidbah.
“Ngi la ioh jingtip ia katei ka jingjia bad ha kajuh ka por, u Expenditure Observer uba dei shibynta jong ka kynhun Central Observer bala thung da ka Election Commission kila don lypa ha katei ka thain. Ula leit poi ha kane ka jaka bad dalade hi ula talasi ia ka kali bad ym shym la shem pisa lane ki jingdih pynbuaid. Watla katta, ngi la hukum ban tohkit halor kane ka jingjia baroh kat kum ka kyndon pyniaid elekshon” ong u District Returning Officer RP Marak.
Ia une u kyrtong ka NPP bad ki Nongbud kiba la sheptieng jur bha na kane ka jingkhie bhur u paidbah, la pynmih noh na kane ka jaka ha ryngkat ka jingiadonlang ki kynhun pyniaid elekshon.
