Shillong, Jylliew 18 : Ka Tnad Pulit kala pyrrkhing bha ia ki bor pahara ha Iingkashari Meghalaya High Court hadien ka jing shah byrngem pynbthei bomb biang.
Ka Iingkashari kala ioh pdiang ia kane ka jingbyrngem lyngba ka shithi bala phah ha ka email hynne ka sngi Ba-ar.
Kane ka dei ka sien kaba ar ba kum kane ka jingbyrngem kala mih pyrshah ia ki bor pyniaid ka Meghalaya High Court.
Kum kane ka jingjia kala don ruh lyngba ka email ha ka 6 tarik Kyllalyngkot mynta u snem, kaba maham ba lah ban don ka jingbthei bomb hapoh ka phyllaw jong ka Iingkashari.
“Halor kane ka jingbyrngem bala ioh pdiang da ki bor khmih ka Iingkashari lyngba ka email, ngi la pyrrkhing bha ia ki bor pahara ha Iingkashari bad ki jaka ba marjan” ong uwei u Heh Ophisar.
La pyntip ba kala don ruh ka jingtalasi (security drill) hapoh ka Iingkashari hynne ka sngi ba-ar ha ka jingiadonlang ki kynhun Bomb Squad bad ki Bomb-Sniffing Dog ne ki ksew sma bomb hynrei ym shym la lap eiei.
Ha kajuh ka por, ka jingtohkit ia kane ka email kala iaid shaid shaid mynta da ka Tnad Pulit.
