Shillong, Nailur 18: Ka ïingbishar Shillong sessions court ka la ai jamin 14 sngi ïa u general secretary ka KSU u samla Reuben Najiar namar ka jingkhlad noh u kpa.
U samla Reuben uba don ha ka jingshah set phatok judicial custody, ha kaba iadei bad ki mukotduma kiba mih na ka jingkulmar haka por pynlong rally arshaka da ka KSU, ha ka 19 tarik Naiwtung.
La ai jamin ia u samla Reuben haka 17 tarik Nailur bad la bthah ia u, ba un pyndem noh ha ka 1 tarik Risaw.
Lah ban kdew ba u samla Reuben u la shah kem ha ryngkat bad u president ka KSU u samla Raymond Kharjana bad u vice president u samla Pynkmenlang Sanmiet hadien ba la pynlong ia ka jingiaid rally arshaka ha ryngkat lama iong ha ka 19 tarik u Naitung.
Ki pulit ki la register case hadien ki jingjia shah kawang maw, shoh briew bad pynjot ia ki mar mata haka por pynlong iaka rally arshaka.
Ia kane ka jingiaid rally arshaka ka KSU la ai jingbit da ki bor district jong ka East Khasi Hills.
Katba ka jingtohkit ka nang iaid, la ialam ia ki nongialam ba la shah kem ha khmat ka iingbishar ha ki katto katne ki khep, katba la pynngat kyndon shuh shuh ia ki ha kaba iadei bad ki mukotduma ba la register ha Sadar, Mawlai bad Rynjah police station.
Hadien kane la kem sa ia 3 ngut ki nongialam ka KSU kat u Jeremiah Pohthmi, u Samuel Kharbani bad u Banjop Dkhar bad baroh ki nongialam ka KSU kiba la shah kem ha kaba ia dei bad kitei ki case kala kot sha ka 6 ngut.
Ka jingshah kem kaba dang shen ka dei ia u president ka KSU Shillong East Circle ka kynhun tohkit SIT najan NEIGRIHMS ha ka 11 tarik u Nailur bad la ialam ia u hakhmat ka iingbishar ha ka sngi kaba bud.
Ka jingpyllait jamin shipor ia u samla Reuben Najiar ka long ban ailad ia u ban leit shala iing namar ka jingkhlad noh jong u kpa, katba ka jingtohkit halor ki jingjia kiba la mih namar ka kynrum kynram ha ka 19 tarik u Naitung ka dang iaid shakhmat.
