Shillong, Nailur 18: U Additional Superintendent of Police uba khmih ia ka Traffic u Lovish Garg ula mynsaw jur hadien ba kawei ka Scooty kaba la shong da ki arngut ki briew kala tynrah ia u ha Urkaliar dang step phyrngab jong ka sngi Thohdieng katba ki dang pynlong ia ka jingkhmih bniah.
Kane ka jingkhmih bniah kadei kaba la leh hajan ka Samkhamti Petrol Pump ha ka por 1:30 mynstep ha kaba kitei ki arngut kiba la shong da ka Scooty kim shim la kohnguh ia ka jingpynsangeh ka jong ki pulit hynrei kila pynher sted bad phet krad.
U SP (City) bah Dangsan Khyriem ula ong, “Kawei ka Scooty kaba song da ki arngut kala pyrshang ban phet krad na ka ka jingkhmih bniah ki pulit bad kala pynher sted khlem da sangeh, wat haba la bthah ia ki ba kidei ban sangeh”.
Ula ong ba u Garg ula ieng ban pynsangeh ia ki hynrei kila tynrah pynban ia u bad phet krad na katei ka jaka.
“Ban iada ba kin ym ioh phet krad, u Lovish Garg, IPS, Additional Superintendent of Police, Traffic, East Khasi Hills, ula tuklar da kaba bthah ia u nongniah ban sangeh. Hynrei ha ka jaka ban sangeh, ka Scooty kala pynher kynsan bad tynrah ia u Additional Superintendent of Police bad ula mynsaw jur ha katei ka jingjia”.
Ia une u ophisar pulit la pynkit noh mardor sha Woodland Hospital bad mynta u don HD Unit.
Da kaba pynpaw ba kane kadei ka jingleh khnang, u Bah Khyriem ula ong, “Ka jinglong jingman ka kdew ba kadei ka jingleh khnang bad paw ba ki don jingthmu ban leh sniew ban pynmynsaw ia u ophisar bad ban lait na ka jingshah khmih bniah”.
Ki pulit kila rejistar ia kane ka jingjia kum ka jingthmu ban shim ia ka jingim bad kila suba jur ruh ba kine ki arngut kidei ki dkhot jongka Khasi Students’ Union (KSU).
“Ka jingthmu ka jong ki ban iaid ha ka por shiteng synnia bad ban kiar na ka jingshah khmih bniah kadei kaba yn hap ban tohkit bniah” ong u Bah Khyriem.
Ula bynrap, “Ki jingkhmih bniah kiba jur kin iai bteng na ka bynta ka jingshngain jong ki paitbah bad ban pynneh ia ka shongsuk shongsain. Baroh ki briew la khmih lynti ba kin bud ia ki jingbthah kiba la pynmih da ki pulit ha ka por ba pynlong ia ka jingkhynra. Kano kano ka jingpyrshang ban kiar khnang na ka jingkhmih bniah ki pulit ne ban ialeh pyrshah ia ki pulit kiba don ha ka kam, yn leh da kaba tyngeh katkum ki kyndon aiñ.
