Shillong, Nailur 02 : Ka Comptroller & Auditor General of India (CAG) kala sei madan ia ki kam bamsap hapoh ka Meghalaya Legislative Assembly kaba kot ia palat T.47.42 lak.
Kat kum ka kaiphod ka CAG halor ka State Finance Audit report jong u snem ba kut ha ka 31 tarik Lber ,2023, la kdew ba ki don artylli ki case bamsap ba hehduh ha Meghalaya Legislative Assembly, kaba kot T.44.08 lak na ka T. 113.85 lak, kaba dang sahteng hapoh ka jingbishar ka Iingkashari.
Kawei pat ka dei kaba kot T.3.34 lak kaba dang sahteng hapoh ka jingbishar ka Iingkashari.
La iathuh ba ka Sorkar Jylla kala pyntip ruh ia ka jingdon haduh 72 tylli kam tuh, jingbamsap bad ka jingduh ei ia ka pisa u paidbah ha ki tnad bapher bapher kaba kot haduh T. 1.14 klur kat haduh u Lber 2023, kiba ka Sorkar kam pat leh eiei.
Ka Tnad PWD kaba don haduh 5 tylli ki case bad ka pisa ka kot haduh T. 17. Lak. Ka Tnad Horticulture ka don kawei ka case bad ka pisa ka kot T. 21.06 lak bad ka Community & Rural Development kaba don kawei ka case bad ka pisa ba kot T. 3.03 lak.
Ka Tnad Mining & Geology ka don kawei ka case bad ka pisa ka kot T. 16.55 lak, ka Tnad Finance ka don kawei ka case bad ka pisa ka kot T.1.94 lak, ka Tnad Health ka don lai tylli ki case bad ka pisa ka kot T. 0.65 lak bad ka Tnad Public Health Engineering kaba don 57 tylli ki case bad ka pisa ka kot T. 7.74 lak.
Kat kum ka Rule 112 jong ka Meghalaya Financial Rules, 1981, kano kano ka jingbamklop ne jingduh ei ia ka pisa u paidbah lane kino kino ki nongkynti bala shem ha ka Government Treasury kane ki Ophis ne Tnad Sorkar, kiba hap hapoh ka Audit jong ka Principal Accountant General, dei ban pyntip mar mar sha ka Principal Accountant General, watla kane ka jingduhnong ka dei ka leh na ka bynta ka jingbha da ki briew kiba bat ia ka jingkitkhlieh.
Nalor kane, haba don kano kano ka kam tuh, bamsap, thok ne duh ei ka pisa Sorkar, dei ban ujor da ka ejahar sha ka Tnad Pulit, ong ka kaiphod.
Kane ka long ka jingpynshai ba kala don ka jingbakla ha ka jingshon bad jingpynmih ia ki kam bamsap hapoh ka Meghalaya Legislative Assembly kumba la paw ha ka kaiphod ka CAG, kaba la pynmih nyngkong.
Na ka liang u Editor u pan map ia kane ka jingbakla ha ka jingthoh ia ka khubor.
Kat kum ka kyrwoh na ka Meghalaya Legislative Assembly, kine ki jingbam klop ki dei kiba donkti da ki arngut ki Cashier ha u snem 1990 bad 2014 bad pyntip ba kine ki Cashier ki dei ruh kiba la khlad hapdeng ka jingbishar. Kumta ka Iingkashari kala pynwai noh ia ka mukotduma pyrshah ia ki.
