Shillong, Nailur 02 : Ka jylla Meghalaya ka dei kaba saw haba ïadei bad ka jingkit ram ba heh duh kat kum ka GSDP ratio hapdeng ki jylla/UT ha ka ri India.
Haba ianujor bad ki 11 tylli ki jylla ka thain Shatei Lam Mihngi bad ki Jylla Himalaya, ka jylla Meghalaya ka wan ha ka kyrdan kaba lai. “Kane ka pyni ia ka jingkiew jong ka jingkitram jong ka jylla.”
Ka jylla ka lah ban shim ïa ki lad ki lynti ban leh eiei halor kane ka bynta bad ban kiar ialade na ka shrip kit ram,” ong ka Controller bad Auditor General ka Ri India (CAG) ha ka kaiphod State Finances Audit Report jong u snem ba kut ha ka 31 tarik u Risaw, 2023.
Ki jingkit ram ha ka Consolidated Fund ka State ki kynthup ia ki ram ba ioh nangne nangtai (market loans), ki ram na ki Bank (Financial Institution) bad ki ram bad ki jingshim pisa lypa (advance) na ka sorkar India.
Ka kaiphod ka la ong ba ha u snem 2022-23, ka jingkit ram ka Sorkar ka long haduh T.14,637.12 klur . Kane ka kynthup ia ka ram ba shim nangne nangtai kaba kot T.11,285.50 klur tyngka, ka ram na ki bank kaba kot T.1,349.04 klur bad ka ram bad ka jingpisa lypa na ka sorkar India kaba long T. 2,002.58 klur.
“Ka jingkiew jong ka ram sorkar ha u snem 2022-23 haba ïanujor bad u snem 2021-22 (T. 12, 165.98 klur) ka long haduh 20.31 percent. Kane ka dei nyngkong eh namar ka jingkiew ki ram bad ki jingshim pisa lypa na ka GOI (117.40 percent) bad ki ram ba shim nangne nangtai (13.79 percent) ,” ka la ong.
Shuh shuh, ka CAG ka la kdew ba ka ram ha ka Consolidated Fund jong ka Jylla ki la kiew da 20.74 percent ha u snem 2022-23 ban ia u snem 2021-22 khamtam eh namar ka jingkiew jong ki ram ba shim nangne nangtai da 13.79 percent bad ki ram bad ki jingshim pisa lypa na ka GOI da 161.90 percent ha u snem 2022-23 ban ia u snem 2021-22.
Ka jylla kam shym la lah ban pynurlong ïa ka total outstanding liabilities kat kum ka GSDP ratio kaba long 28 percent kaba la buh da ka Meghalaya Fiscal Responsibility and Budget Management (MFRBM) Act, 2006 na ka bynta u snem 2018-19 haduh 2022-23, kala ong.
