TURA, K’lyngkot 9: Ka Indian National Congress kala phah ia ka kyrteng jong u Ophisar Meghalaya Civil Services (MCS) barim Laben Ch Marak ban long u kyrtong jong ka party u ban iakhun pyrshah ia u Myntri Rangbah Conrad K Sangma na South Tura constituency ha ka elekshon MLA-2023.
Ia u Laben la jied napdeng ki lai ngut ki briew ba pan ticket bad ki arngut kiwei pat ki dei u Brenzield Marak bad u Sanjiv Sangma.
Ka working president ka MPCC Debora Marak ka pyntip sha ki lad pathai khubor ba ka party kala jied ia u Laben Marak kum u kyrtong bad un sa pynbna paidbah ia kane ha ryngkat bad kiwei pat ki kyrtong.
U Laben Ch Marak (44 snem ) ula rung sha ka kam Meghalaya Police Service (MPS) kum u DSP ha u 2010 hynrei hadien ula leit sha ka MCS ha u 2012 bad long u EAC. Ula shakri kum u EAC ha Ampati bad hadien kum u BDO ka Rongram block.
Ula iehnoh ia ka kam Meghalaya Civil Services ha u 2017 bad iakhun ia ka elekshon 2018 kum u kyrtong shimet na Dadenggre Constituency pyrshah ia u MLA bad mynta u James K Sangma.
Shuwa kane, ula iakhun teng ia ka elekshon 2003 na Rangsakona bad u khlem jop satia.
U Laben u dei uba la pyndep ia ka Bachelor of Arts (Honours) bad Master of Arts in English na Delhi, bad ruh ia ka B.Ed na Tura college of Teachers Education. U Laben u dei ruh u President barim ka FKJGP Garo Hills region.
U dei ruh u President ka National Students Union of India ha Jylla bad u Nongseng barim bad chief instructor ka West Garo Hills Taekwondo martial arts school.
