Shillong, Jymmang 23: U president ka Voice of the People’s Party (VPP) u bah Ardent Miller Basaiawmoit hynne ka sngi ula sdang ka jingshah thngan khlem buh por mar pyrshah ka khyrdop Secretariat.
Watla ka jingshah thngan khlem buh por, kadei bala rai hi da u president ka VPP u bah Ardent Miller Basaiawmoit u badei ruh u MLA ka Nongkrem konstitwensi hynrei ha kane ka sngi, la wan synran ia u bah Ardent da u MLA ka North Shillong u bah Adelbert Nongrum bad kiwei kiwei de ki dkhot bad nongialam ka VPP.
Haba kren sha ki lad pathai khubor u bah Ardent ula ong ba un iai bteng ia kane ka jingiakhih shah thngan khlem buh por tad haduh baka sorkar jylla ka khot ban iakren ban pynlong noh syndon daka dorbar kyrpang ban iathir halor ka bhah thungkam lane ka Reservation Policy.
U bah Ardent haba pynrem iaka jingialam bakla kiwei ki sengsain pyrthei ula ong “Kane ka mat jingdawa kam dei tang ka ban pawnam ka Party ha ki rynsan ilekshon hynrei ka VPP kala shim ban dawa bishar bniah iaka Reservation policy naka bynta ka bha ka miat ki samla ka jylla ha ki 50 snem ban wan”
Ula ong ba ka Party ka ieng skhem haka nongrim ban dawa naka sorkar ban bisharb bniah biang iaka Reservation policy namar katkum ka jinglong jingman mynta, kane ka bhah thungkam ka noh shilliang palat tang sha kawei ka jaitbynriew.
