Agartala, Nailar 24: Satang kumba hynriew bnai ban leit sha ka ilekshon assembly, ka BJP kaba synshar ha Tripura kala mad ia ka jingtynjuh da ka jingtrei borbah jong ka TIPRA Motha.
Kane ka jingshah tynjuh jong ka BJP kala wan jia hadien ba u Nongialam ka Party, kaba don ha ka Liang Pyrshah ha Autonomous District Council (ADC) u Hans Tripura, ula leit ban ban pyniasoh noh ialade sha ka seng Tipra Motha hynnin ka sngi ba Ar.
Ha ryngkat u Hans Tripura baroh ki la don haduh 6500 ngut ki nongthep vote kiba dei na ki 3000 tylli ki longiing kiba la wan ban pyniasoh bad ka Tipra Motha da kaba pdiang ia ki lama jong ka party na u nongialam ba hakhliehduh ka party (Motha) u Pradyot Bikram Manikya Deb Barman.
Ia kine ki Nongialam bad nongkitkam ka BJP la pdiang burom ha ka jingialang kaba heh bha bala pynlong ha ka thain bManikpur, kaba hap hapoh ka Dhalai District, Tripura.
Ka Tipra Motha kan dei ka party kaba hakhmat eh ban lamkhmat ha ka jingia aireng pyrshah ia ka BJP ha kane ka ilekshon assembly ka ban wan ha Tripura.
Haba aijingkren ha ka prokram, u Hans Tripura ula ai khublei ia ki nongkyrshan jong u bad ong ba dei tang ka party Tipra Motha kaba trei bad khmih na ka bynta ka bha ka miat jong ki trai shnong bad kan pynthikna ruh halor ka jingkyntiew ia ka ioh ka kot bad ka roi ka par hapdeng ki nongshong shnong kiba dei ki trai shnong riewlum kiba dang sahdien.
U Pradyot Kishore Debbarman ula pdiang sngewbha ia baroh ki nongthep vote kiba dei ki trai shnong sha ka party Tipra Motha, bad ong ruh ba kadei ha ka jingkhlain bad ka jingiatylli jong ki trai shnong ka ban pynlah ia ki trai shnong ba kin pynioh pat ia ki hok ki jong ki na ki kti ba phai lyndet jong ka BJP kaba la pynjot ia ka jylla.
