Nongstoiñ, Naiwieng 26: Ki nongїalam ka National Peoples Party-Nongstoiñ Block hynne ka sngi Ba-ar, ka la pynlong їa ka jingїalang ban їatai sani kumno ban pynkhlaiñ їa ka party sha ka elekshon MDC ban long ha u snem bala lah.
Ia kane ka jingїalang bala pynlong ha ha MECOFED hall New Nongstoiñ, la pyniaid da u bah Gabriel Wahlang MLA/MDC ha ka jingїadon u MLA barim bah Macmilan Byrsat,bah Hamletson Dohling Working president ka NPP Shillong city, bah Himalaya Muktan Shangpliang Nongaiktien ka NPP, u bah Kimfa S.Marbañiang MLA barim, ki riew rangbah bad kiwei kiwei.
Nalor kata ha kane ka sngi ka party ka la pdiang burom ruh їa ki nongialam jong kiwei pat ki seng saiñ pyrthei kiba dei na ka Congress, HSPDP, TMC, kiba la wan ban pynїasoh sha ka NPP ha Nongstoin.
Ka NPP Nongstoiñ Block ka la pynithuh ruh ha kane ka sngi їa ki nongaplai tiket na ka bynta ka MDC Election ka ban sa long ha u snem ban wan. Hynrei haduh mynta, dang don tang u bah Dressara Marngar u ba dei u Nonghikai skul na ka shnong Laitkseh u ba la phah їa ka aplikeshon ban pan tiket na ka NPP.
Ka jingїalang ka la mynjur ba na ka bynta ka MDC elekshon, kin sa phah їa ka kyrteng jong u sha ka District bad ka State Election Committee ba kan pynbna paitbah.
U bah Macmilan Byrsat u la ong ba ka jingwan pynїasoh jong u bah Gabriel Wahlang MLA ka Congress sha ka NPP kam don jingktah ei ei ha ki elekshon ban wan. Namar ba baroh ar ngut ki don ka jingїatreilang na ka bynta ban pynkhlaiñ shuh shuh їa ka party.
Da ka jingdon jong u MLA ba mynta kum u president ha ryngkat ka jingtreilang jong u kum u MLA barim, kam don jingeh ei ei ruh em ba kin jop ha ka MDC elekshon.
U bah Himalaya M.Shangpliang u la ong ba lada ki nongїalam jong ka party ki trei shitom na ka liang ka sorkar ka kloi ban phai khmat na ka bynta ki kam pynroi kiba bun ba ki paitbah ki donkam.
U la ong ruh ba ki jingkynthoh їa ka NPP katba nang mih ki sngi ki nang bun, hynrei ki dak ki shin ki pyni ba ki paitbah pat ki la shoh jingieit namar kat nang mih ki sngi kiba wan rung sha ka party ki nang bun ki bun.
U bah Hamlestson Dohling working president ka party u la ong ba ha kine ki snem ba ka NPP ka la їalam їa ka sorkar, ki paitbah ka jylla ki la їoh shibun ki jingmyntoi lyngba ki kam pynroi bad ki jingїarap ha ki shnong ki thaw.
Ka sorkar ka la shimkhia ruh ban їakren halor ki jingeh ba ki paitbah ki їakynduh kum ka jingpynbeit їa u pud u sam, ka jingpyrnung їa ka ktien Khasi bad Garo ha ka Khyrnit kaba phra jong ka riti synshar ka ri, ka Inner Line Permit bad kiwei kiwei.
U la ong ruh ba halor kitei ki mat kiba don kam ka sorkar ka la pyrshang katba lah ban buddien na ka por sha ka por bad ban pynsngew sha ka sorkar pdeng ba kan pynurlong noh kham kloi la kitei ki mat jingdawa.
