Nongstoiñ, Naiwieng 20: Ka Hill State Peoples Democratic Party (HSPDP) kala sdang ban kyrhuh sha ka elekshon MLA-2023 na Rambrai-Jyrngam Constituency kaba dei ka Constituency u President Bah KP Pangniang, da kaba pynlong ia ka jingialang paidbah hynnin ka sngi saitjain ha Raidmynsaw.
Ia kane ka jingialang la pynlong da ka HSPDP-Youth Wing jong ka Rimuliang Zone bad la pyniaid ia ka da u President Bah Ombarly Wanniang. Ki paidbah na kylleng ki jaka jong ka thain kila wan ban iashimbynta ha kane ka jingialang ban sngap ia ki jingkren elekshon jong ki Nongialam kane ka Sengriewlum.
Haba kren ha ka jingialang, u Bah KP Pangñiang u la pynkynmaw ba ka HSPDP ka dei ka party ka ba ki paitbah kin dang їabeh ban thep vote. U la ong ba ka HSPDP ka dei ka party kaba їeng halor ki nongrim kiba skhem ban pynneh pynsah їa ka riti, ka dustur, їa khyndew ka shyiap bad їa ka hok longtrai jong ka jaitbynriew.
U la ong ruh ba lada lada ki paitbah ka thaiñ muliang ki sngew nguh їa kaei kaba u (L) bah Hopingstone Lyngdoh u la leh, ki dei ban kynmaw ba ki lai tylli ki skul ka Mawdiangsnam Govt LP, ka Langpih Govt L.P ka Umtap Govt L.dei kP, ki dei ki matti kiba u (L) Maieit Hopingstone Lyngdoh u la leh.
U Bah Pangniaug U la pynkynmaw ruh ba ha u snem 1963, u (L) Maieit Hopingstone Lyngdoh u la pynrung їa ki hynriew phew ar tylli ki shnong ha ka electoral roll jong ka United Khasi & Jaiñtia Hills District Council ba kin їoh їa ka hok kum ki nongthep vote bad ki nongshong shnong jong ka West Khasi Hills.
U bah Pangñiang u la pynkynmaw ruh ba ha ki snem ba mynshuwa ka Langpih Polling station ka la shah pynkynriah noh sha Mawsikar hynrei ha u snem 2016-17 ma u ryngkat ki riew rangbah ka thaiñ, ki la їakhun tyngeh ban pynphai pat їa ka polling station sha Langpih.
“Nga la thoh da ka shithi shaduh ka Election Commission jong ka ri India, ha kaba ka Election Commission ka la mynjur bad bthah ia u Arunkumar Kembhavi uba long u Deputy Commissioner ka West Khasi Hills ha katei ka porba un leh їa kaba donkam bad їa ka Langpih polling station la lah ban pynphai biang” ula pynkynmaw.
Kiba їadon lang ha kane ka jingialang ki kynthup ia u samla Pynshai Joel Dkhar Organiser bad Joint Secretary ka HSPDP Youth Wing central body, bah D.P. Wanñiang President ka HSPDP Rimuliang zone, bah Sandondor Ryntathiang President ka HSPDP Youth wing centrel body, bah Khrawpyrkhat Marweiñ secretary ka HSPDP Ribhoi, ka kong Badariti Lyngdoh Nonglait president HSPDP Women wing central body bad kiwei kiwei.
