Shillong, Jymmang 24 : Ka wat ba-ar jong ka jingiakren pynbeit pud hapdeng u Myntri Rangbah ka Assam bad Meghalaya kala sdang hynne ka sngi Balang hapoh ka Guest House Koinadora ha Guwahati.
Ka Kynhun ba leit iashimbynta na ka Jylla Meghalaya ki kynthup ia u Myntri Rangbah ka Jylla Conrad K Sangma, u Symbud Myntri Rangbah Bah Prestone Tynsong bad Bah Sniawbhalang Dhar bad u Myntri Sorkar Bah Comingone Ymbon lem bad ki Heh Ophisar kynthup u Chief Secretary.
Ka kynhun na Assam ki kynthup ia u Myntri Rangbah Himanta Biswa Sarma, u Myntri Sorkar Atul Bora, Pijush Hazarika bad Chandra Mohan Patoway lem bad ki Heh Sorkar.
Ka jingiakren ha kane ka kynti jong ka wat ba-ar ka long na ka bynta ki hynriew tylli ki jaka ba dang don hapdeng ka jingiakhia kiba kynthup ia ka Langpih, Borduar, Nongwah-Mawtamur, Desh Doomreah, Block 1 & Block II, bad Psiar-Khanduli.
Lah ban kdew ba ha ka 29 tarik Lber 2022, u Myntri Rangbah ka Assam bad Meghalaya kila iasoi ia ka soskular bala pynbeit ia ki hynriew tylli ki jaka napdeng ki 12 tylli kiba don hapdeng ka jingiakajia, ha ka jingiadon ryngkat u Myntri kam Pohiing ka Ri u Amit Shah.
Ia kine ki soskular la iasoi hapdeng ki arngut ki Myntri Rangbah ha ka jingiadon lang ki Chief Secretary na baroh artylli ki Jylla lem bad ki Heh Ophisar n aka Ministry of Home Affairs (MHA).
