Shillong, Lber 21 : U MLA/MDC barim ka Nongkrem Bah Lambor Malngiang, ha ka sngi Saitjain, ula plie paidbah ia ki artylli ki surok bad ka jaka shong paidbah ha Rangbihbih Pomlakrai Parish, kiba la pyntrei na ka song pisa ba palat T.2 klur ba ula pynioh na ka Sorkar Jylla.
Kane ka jingplie paidbah ia kine ki jingtei kala wan jia ruh shisngi shuwa ka jingplie ia ka Rangbihbih Pomlakrai Parish, ka ban long lashai ka sngi ka 22 tarik Lber. Kawei na kine ki surok ka dei kaba poi sha Iingmane bad kawei pat kaba poi sha ka jaka sah jong ki Sister.
Kine ki jingtrei ki dei kiba la pynlut haduh T.2.10 klur ka pisa bala ioh na u Myntri Rangbah ka Jylla Conrad K Sangma bad kumjuh ruh na u Symbud Myntri Rangbah ba khmih ia ka Tnad PWD (Roads) Bah Prestone Tynsong.
Ia kine ki jingtei la plie ha ka jingiadon ryngkat u Rev. Fr. Tobias Kharngapkynta ryngkat u Rev. Fr Genessimus Nongneng, rangbah balang bad kiwei kiwei de ki riew rangbah bad ki longkmie.
Na ka liang jong ki Father bad ki Sister kila pynpaw ka jingsngewnguh ïa u Bah Lambor Malniang uba kloi ban sngap ia ka jingud jingnam jong ki paidbah wat lada u khlem long shuh u MLA ne MDC jong ka Nongkrem bad kumjuh ruh ïa u Bah Ronnie V Lyngdoh uba dei u MLA jong ka Mylliem.
Haba kren kum u kongsan, u Bah Lambor Malniang u la ong ba nangne shakhmat kan don ka jingïatrei lang kaba khlain bad ka jingkyrshan lang iwei ïa iwei pat ha man ki jingdonkam.
“Ha kane ka por, nga dei tang u briew ba trei mon sngewbha namar ba ka iktiar ba khlain ba nga ju bat ngam shym la ïoh shuh ban bat, ka jingsiew na ka sorkar kumba ioh tulop ki MLA bad MDC, nga ngam ioh shuh, hynrei ka mynsiem pat kam thait” ong u Bah Lambor.
U Bah Lambor u ai khublei kyrpang ïa u Myntri Rangbah bad ruh ïa u Bah Prestone Tynsong kiba la sngap ïa ka jingkyrpad jong u na ka bynta ka bit ka biang jong ki paidbah ka Nongkrem Constituency.
