Shillong, Jymmang 23: U Vice Chairman ka kynhun Hynniewtrep National Liberation Council (HNLC) Manbhalang Jyrwa hynne ka sngi Ba-ar, ula ong ba kan long kaba eh ban pyniaid shakhmat ia ka jingiakren iasuk lada ka Sorkar kam mynjur ban map noh ia baroh ki kam pyntriem jong ki dkhot.
“Khlem ka jingmap noh ia ki kam pyntriem baroh kumno ngin pyntyllun shakhmat ia ka jingiakren iasuk” ong u Bah Manbhalang haba iakren bad ki nongthoh khubor.
Ia u Bah Manbhalang la synran da u Political Secretary ka HNLC Aristerwell Thongni bad arngut ki PSO- Storgy Lyngdoh bad Raymond Lapang.
Ula pyntip ruh ba iaka kam ba iadei bad ka jingmap noh bad ki jingkhoh hajir da ka Nationa Investigation Agency (NIA) ruh la iakren ha ka jingalang bad u Symbud Myntri Rangbah ba khmih ia ka Tnad pohiing (Home) Bah Prestone Tynsong dang shen.
“U Myntri kam Pohiing bad ka Sorkar kila ai ka jingkular ha ngi ba katba ka jingiakren iasuk ka dang iaid shakhmat, kan ym don sati aka jingkrem, ka jingpyndih (pyrshah ia ki Nongialam bad ki Dkhot ka HNLC) “ ula ong.
“Ka Sorkar Pdeng bad ka Sorkar Jylla kila pynshai ba kam ym don jingeh satia hynrei ngi kum ki Nongialam ngi dang don ka jingsngew ba lada ngi la wan phai lut sha Jylla, ka NIA kan sa kem ia ngi. Kane ka dei ka kam ka bym pat shai mynta. Jin ba kam don kum kane ka jingartatien, ki Nongialam jong ngi kin jin da la poi hangne” ong u Bah Manbhalang.
Haba pynpaw ba ka HNLC ka kwah ban pyntyllun shakhmat ia ka kam, u Vice Chairman ula ong “Ka kami a mynta hi ka long ba ngin sa shong iakren pura noh shen ha ka taiew ba nyngkong u bnai Jylliew. Hadien bas dang ka jingiakren ba pira, hangta ngin sa lah ban kham batai bha halor kane ka kam”.
Ula pyntip ba bun ki Nongialam ka HNLC kin sa nang wan sha Jylla na ka bynta ka jingiakren iasuk haba pynpaw ba u Chairman ka HNLC Bah Bobby Marwein ruh un sa wan ban iadon bynta lang ha ka jingiakren ha ki bynta ba khatduh jong ka jingiakren.
U Nongmihkhmat ka HNLC uba dei u President ka HNYF Bah Sadon Blah ula ong ba naduh kaba sdang jong kane ka jingpynbeit iakren iasuk, ka kynhun kala shong iakren haduh lai sien bad u ksiang ka Sorkar Pdeng lem bad ki heh Ophisar na ka Home Ministry.
