Shillong, Jymmang 13: Ka Joint Military Exercise SHAKTI jong ka ri India bad ka France kaba 7 kala sdang hynne ka Sngi Nyngkong ha Umroi kaba dei ka jaka kaba la pynkhreh kyrpang ia ki tiar ki tar na ka bynta ban ai jinghikai.
Kane ka Joint Exercise kala sdang ha ka 13 tarik bad kan kut ha ka 26 tarik u Jymmang.
Ha kane ka jingplie ia ka jingsdang ia ka Joint Exercise la wan ban iadonlang lang u Nongkit Tiensyiem jong ka ri France sha India u Thierry Mathou bad u Major General Prasanna Sudhakar Joshi u General Officer Commanding 51 Sub Area.
Ka Joint Exercise SHAKTI kadei ka jingai jinghikai pyntbit kaba la pynlong mar kylliang hapoh ka ri India bad ha ri France bad ka sien kaba khatduh kaba la pynlong ia kane ka jingai jinghikai kadei ha u Naiwieng 2021.
Ka kynhun na ka ri India ka kynthup ia ki 90 ngut ki shipai kaba la mihkhmat na ka RAJPUT Regiment bad na kiwei pat ki tnad shipai.
Ki nongpeit pyrman na ka Indian Navy bad ka Indian Air Force kin don bynta lang ha kane ka jingai jinghikai.
Ka kynhun ka ri France ka kynthup ia ki 90 ngut ki shipai ha kaba bun hi kidei na ka 13th Foreign Legion Half- Brigade (13th DBLE).
Ka jingthmu jong kane ka jingai jinghikai ka long ban kyntiew ia ka rukom pyntbit jong ki shipai na baroh ar tylli ki ri, ha kaba iadei bad ki kam khynra ki bapher bapher bad khamtam ban pyndep ia ka Chapter VII kumba la pynkup bor da ka United Nations.
Kane ka Joint Exercise kan pynleit jingmut ha kaba iadei bad ki kam khynra ha ki jaka khapsor bad ha ki jaka lum bad ban pyndep iaka thong ban don haka kyrdan kaba heh ha kaba iadei bad ka jingdon iaka met ka phad kaba khlain, ban pyntbit ha ka jingleh ia ki Drill na ka jingioh jinghikai lang ha ka jingkhynra bad ban ia sam mar kylliang ia ki buit.
Ki Tactical Drills kiba dei ban praktis ha kane ka Joint Exercise ka kynthup ia ka jingpynkhreh ban iakhun ia ki lehnoh kiba wan ban knieh ia kano kano ka jaka, ban buh ia ka Joint Command Post, ban buh ia ka Intelligence & Surveillance Centre, ban ai ka jingpahara ia ka jaka hiar ki liengsuiñ, ka jingleit khynra, ka jingpyndonkam ia ki Drone bad kiwei kiwei.
La khmih lynti ruh ba lyngba kane ka Exercise ym tang ba kan ai jinghikai bad pyntbit ia ki shipai ha kiba bun ki bynta hynrei kan wanrah ruh ia ka jingiadei bad ka jingiatreilang kaba iajan hapdeng kine ki ar tylli ki ri.
