Guwahati, Naitung 31 : Ka Mizoram bad ka Assam kan sdang biang ia ka jingiakren pynbeit pud ha ka 9 tarik Nailar ha Aizawl, kaba long hadien 20 bnai bala sangeh, khnang ban wad ia ki lad ki lynti ban pynbeit noh ia ki jingiakajia pud.
Kane kan dei ka sien kaba saw jong ka jingiakren naduh ba mih ka jingjia iaumsnam ha u Naitung 2021, kaba lam sha ka jingiap jong ki 6 ngut ki Pulit bad uwei u riew paidbah na Assam.
Ka jingiakren kan dei kaba khlieh da u Myntri kam Pohiing ka Mizoram K Sapdanga bad u Myntri ka Assam Border Protection and Development Atul Bora.
Wat hapdeng shibun sien ki jingiakren, kynthup lai tylli kaba long hapdeng ki Myntri Sorkar naduh u Nailar 2021, ka jingiakajia ka dei ka bym pat lah ban pynbeit satia.
Ka Mizoram kala kam ba haduh 509 sw mile ka jaka jong ka Reserve Forest bala pynbna ha u snem 1875 hapoh ka Bengal Eastern Frontier Regulation (BEFR), 1873, ka hap hapoh u pud u sam jong ka katba ka Assam ha kawei ka liang, kala khein ia ka map bala pynkhreh da ka Survey of India ha u snem 1933 kum u pud u sam ka Jylla
Hynrei, baroh artylli ki Jylla kila mynjur ban pynneh ia ka jingshongsuk ha khappud bad ban pynbeit ia ki jingiakajia lyngba ki jingiakren.
