Shillong, Nailar 20 : Ka Tnad ka Koit ka Khiah ka Jylla, kala peit thuh bha ia ka jinglong jingman hadien ba ka Health Ministry, kala ai jingbthah ha ka sngi Nyngkong ia baroh ki Jylla ba kin peitngor bha namar ka jingsaphriang jong u khniang Monkeypoc (Mpox) ha kylleng ki ri ka pyrthei.
Nalor ka Health Ministry, ka World Health Organisation (WHO) ruh kala pynbna ia ka jingsaphriang u khniang Mpox kum ka jingpang ba hap shimkhia kyrkieh ha satlak ka pyrthei. Une u khniang ba mynta u dei u khniang thymmai bad uba kloi ban iabit bad ba pynjur ia ka jingshitom, kaba la pynkhuslai bha ia ki stad ka koit ka khiah bad ki nongthaw ain.
U Heh ka tnad ka Koit ka Khiah ka Jylla ula ong ba ia mynta hi, ka Tnad ka koit ka khiah kala peit thuh bha ia ka jinglong jingman. “Ngi la ioh pdiang ia ka jingbthah na ka Heath Ministry ka Sorkar Pdeng. Ngi hap ban peit ia ka jinglong jingman” ula ong.
Ha ka sngi Nyngkong, ka Sorkar Pdeng kala pynmih ia ka jingbthah sha baroh ki borkhmih ba kin peit pyrman bha ha ki ‘Kad liengsuin, ki kad khaii harud duriaw bad ki jaka khappud” ka Ri Bangladesh bad Pakistan namar ka jingwan jongki nongshongshnong ba kine ki ri ha kum kane ka por ba saphriang u khniang Mpox.
Ka Health Ministry kala bthah ruh ia ki Jylla ban pynkhreh lypa ia ki Hospital ba kin lah ban ai jingsumar ia kiba pang Mpox. Ki Hospital ha Jylla kin long kum ki nodal centre ban ai ia ki jingtip ba donkam halor ka Mpox. Ka Sorkar Pdeng kala bthah ruh ia ki Testing Laboratories ba kin long kiba la pynkhreh.
Ia mynta ki don haduh 32 tylli ki testing laboratories kiba lah ban test ia u khniang Mpox.
Ka jingsaphriang jong u khniang Mpox mynta ka kynti kala sdang ha ki bnai ba sdang jong une u snem bad la antad ba ka jingdon ki briew kiba kit ia une u khniang thymmai ki don kumba 30,000 ngut. Kiba iap kila kot ruh ia ka 1000 ngut khamtam eh ha ri Africa.
U khniang Mpoc u lah ban saphriang lyngba ka jingpyniadei para met bad u briew ba don khniang, kynthup ia ka jingktah, doh ieid ne iaphylliew jingieid lane lyngba ki jain ki nep bad na ki jingshah dait, trot jong ki mrad bad ki briew.
Ki Longkmie ba armet ki lah ruh ban pyniabit ia u khniang sha ki Khunlung ba dang pun hakpoh. Ki dak jong kane ka jingpang ki kynthup ia ki kynja khniang ba mih ha ka met nalor ka jingshit met, ka jingktah khlieh, ka jingpang ki ksah bad kiwei kiwei.
