Nongpoh, Nailar 20 : Ki Nongshongshnong ka Umroi Madan, kila pynpaw ia ka jingpyrshah kaba jur halor ka jingthmu jong ka Sorkar ban pyniaid lynti ia ka surok 4-Lane na Umiam sha Malidor lyngba ki ranab lum jong ka Shnong, kiba don ia ka tyllong umbam umdih jong ka Shnong.
Kine ki nongshongshnong ba ialam da u Bah CL Marshaning bad u Bah T Marbaniang, kila leit iakynduh ia u Deputy Commissioner ka Ri-Bhoi District bad aiti da ka dorkhas-kaba pynpaw ia ka jingpyrshah ia kane ka jingprat lynti na ki ranab lum jong ka Shnong.
Haba kren sha ki lad pathai khubor, u Bah Marsharing bad Bah Marbaniang kila pyntip ba ka Sorkar ka thmu ban pynkynriah noh ia ka lynti iaid jong ka surok 4-lane naduh na Umiam-Malidor, da kaba pyniaid sha ki ranab lum jong ka Shnong Umroi Madan, kiba don ia ki tyllong umbam umdih jong ka Shnong.
Kila pynpaw ba kane ka jingthmu kan long ka jingtim ia ki nongshongshnong ka Umroi Madan namar ki longiing longsem jong ka Shnong ki ioh umbam umdih pateng la pateng na ka tyllong um kaba don ha kine ki rinab lum.
“Lada pyniaid ia ka surok 4-lane na kine ki ranab lum, khlem pep, ka tyllong um kan sa jah noh bad naei shuh ngin ioh ia ka tyllong um ban bsa ia ka shnong Umroi Madan” kila ong.
Kine ki rangbah kila pynpaw ia ka jingsngewnguh ia u Deputy Commissioner halor ka jingkloi jong u ban sngap ia ki jingeh jong ki paidbah ka shnong bad ka jingkular ba un sa btah ia ki Nongtrei ka Ophis ba kin leit jurip khnang ban phah jingtip sha ka Sorkar Jylla.
