Shillong Nailar 20: Ka Achik Conscious Holistically Integrated Krima (ACHIK) kala pynkynmaw ïa u Myntri Rangbah ka Jylla Conrad K. Sangma ban sdang noh mardor ïa ki jingïakren halor ka jingsahteng jong ka jingdawa kaba la slem ban pynbna ïa ka Tura kum ka Winter Capital.
Ha ka shithi kaba la phah sha u Myntri Rangbah ka Jylla, lyngba u Deputy Commissioner jong ka West Garo Hills, ka ACHIK kala pynpaw ba ka ophis treikam u Myntri Rangbah kala dep ai ia ka jingpynthikna ïa ka seng ba kan sa pynlong ia ka jingïakren halor kane ka mat hynrei haduh mynta kam shym la don kano kano ka jingshim ia ki sienjam.
Kala pynpaw ruh ba ïa katei ka jingpynthikna la ai ha ka jingïalang kaba la long mynshem snem ha Chief Minister Mini Secretariat kaba don ha Tura bad sha ki paidbah lyngba ki lad pathai khubor.
Ka ACHIK kala pynpaw ruh ba ka jingdawa ban pynlong ia ka Tura kum ka Winter Capital kadei kaba la slem bha bad kaba shong nongrim bad kaba kongsna bha ia ki jaidbynriew Garo. Ka seng ka ngeit skhem ba ka jingpynlong ia ka Tura kum ka Winter Capital kan ym pynbha tang ia ka jingai jingshakri ia ki paidbah hynrei kan noh synniang ia ka roi ka par ka bym noh shilliang ha kylleng jong ka jylla.
Kumban shu kdew, ka ACHIK kala pynlong ia ka jingshah thngan kaba 14 sngi ha u Naitung 2023 ha Tura ban pynjur ia ka jingdawa ban pynlong ia ka Tura kum ka Winter Capital.
