Shillong, Iaiong 05: Tip shuh iano yn kynnoh, dei ka jingtrei torti u contractor ne dei ka jingkhein sting shaba palat jong ka Tnad PWD (roads) kaba khlem pyniaid ia ka kam kat kum ki kyndon jingbthah (guidelines), haduh ba ka surok ba dang shu dep siang rong dang shen, ka dei kaba suk pat ban khlong wat tang da ki kti ia ka rong.
Kane ka surok ka dei kaba la pyntrei ha Mawroh mar pyrshah ka skul Meghalaya Police Public School. Kane ka kam kala mih paidbah hadien ka jingsaphriang jong kawei ka video ha ki rynsan social media, kaba pyni ba uwei u riew paidbah ula shu khlongkai da ka kti ia ka rong jong ka surok ba dang shu dep siang thymmai.
U nongthoh khubor haba pyrshang ban wad iaka jingshisha ula iohi ba kala don ka jingsiang rong thymmai iaka surok Mawlai Mawroh na marjan ka Meghalaya Police Public School kaba mih sha Umshing –Mawkynroh ter ter. Ha kane ka jingleit jurip, la iohi ba ki nongtrei ki dang bunkam ban siang rong thymmai ia kane ka surok.
Haba iakren bad u Contractor, ula iathuh ba kane ka video ba la saphriang ha ki rynsan social media kadei ka bynta jong ka surok ba u pyntrei bad kadei kaba don ha jan ka Meghalaya Police Public School.
Ula iathuh ba kane ka jinglah ban shu khlong iaka surok daka kti kadei namar ia kane ka surok la pyntrei haka por slap bad dei namar kata, ka rong ba ki nongtrei ki khleh bad ki siang kam bat shuh iaki maw, ka ba pynlong iaka rong ban lait noh watla kila dep ban tylliat daka Road Roller.
U Contractor ula iathuh ba ia kato ka bynta jong ka surok ba la sniew biang, la siang haka taiew bala dep haka por ba dang jur bha u slap bad namar ka jingjhieh bad sngem ka khyndew, kaka pynlong iaka rong thymmai bad iaki maw ban nym bit haka surok ba dang shu siang rong.
Haba iadei bad kane ka HITO Mawlai circle kala dawa naka tnat PWD ban phah sangeh shwa ban pyntrei ia kane ka surok, tad haduh ba ka tnat ka wan jurip bad ka tohkit halor kane ka rukom pyntrei ia kane ka surok.
