Gangtok, Risaw 8 : Ka video kaba pyni ba u Myntri ka Sikkim Samdup Lepcha, ula jam ia ka wah Teesta ba ishyrkhei na shiliang sha shiliang tang da u tyllai ha ka sngi Saitjain, kala saphriang kylleng ki jaka mynta.
Kane ka Video ka pyni ba kumno u Myntri ula buh ialade ha ka jingma tang ban ioh jam sha shiliang kane ka Wah ban leit iakynduh ia ki lanot kiba sahkut sha shiliang.
Ha kane ka jingjam ia ka wah, kala don ruh ka khep ba une u Myntri ula sahkut hapdeng bad shu sdien ha suin ia kaba la jan tyngkhuh ruh ia ka umsaw kaba khlain jong kane ka wah.
U Lepcha uba mihkhmat ia ka Lachen-Mangan Constituency, ula shim ia kane ka sienjam ban poi sha sor Chungthang, kaba la shah ktah jur eh ha ka jingshlei um hapoh ka Jylla.
Ka Teesta Stage-III Dam ba 1200 MW kaba don ha Chungthang,kala shah pynjulor lut ploin ha kane ka jingshlei ym kaba jia n aka jingbthei jong ka pung thah ha Lhonak.
Namar ka jingbym lait lynti ban leit sha ka thain, u Myntri ula ialam ia ka Kynhun ban shim ia kane ka lynti kaba ima bad ban iaid kjat na Mangan sha Chungthang.
Ka lynti ban poi sha kane ka sor ka dei tang da ka jingjam ia ka wah Teesta, kaba don heh um bha watla ka um kala nang hiar mynta.
