Shillong, Nohprah 22: Ka kynhun ialehkai Football jong ka Meghalaya kala ioh rung sha ka Quarter Final jongka 78th Senior Men’s National Football Championship jong ka Santosh Trophy 2024-25 hadien ba kala pynrem ia ka Goa da 1-0, katba ka Tamil Nadu bad ka Odisha kila iakhaid da 1-1 ha ka jingialehkai kaba la long ha Deccan Arena hynne ka Sngi u Blei.
Ka Meghalaya kala ioh khur 7 point na ki 4 sien jongka jingiakhun ha ka Group B, katba ka Goa ka don ha ka kyrdan kaba 5 kaba la ioh tang 3 point.
Ka Meghalaya kala jop da kaba ialehkai bha pyrshah ia ka Goa ha ka minit kaba khatduh ha kaba kala ioh thep ia ka kol lyngba ka Penalty kaba la leit ban shut da u Damanbhalang Chyne ha ka minit kaba 89 bad kane ka kol kala pynthikna syndon ia ka Meghalaya ban khur ia ka 3 point.
Naduh ka por ba sdang ka jingiakhun, kine baroh ar tylli ki kynhun ki la ialehkai bha bad wat kila ioh ia ki kabu ha ka kylla step hynrei kim shym la lah ban thep kol bad ka jingiakhun kala kut ha ka jingiakhaid, hynrei dei ha ka kylla miet ba ka Meghalaya kala ioh ia ka penalty haba u rangialehkai shadien jong ka Goa ula tan ia u nongialehkai ka Meghalaya u Deibormane Tongper bad u referee khlem kano kano ka jingartatien ula ai iaka penalty.
Ka Goa kala jop shisien bad rem arsien ba kala donkam bha ban pynrem ia ka Meghalaya ban ioh ban rung sha ka Quarterfinal bad wat ka Meghalaya ruh kala ialehkai bha ban pynthikna ialade ban ioh rung shaka Quarterfinal da kaba jop ia kane ka jingialehkai pyrshah ia ka Goa.
