Shillong, Nohprah 09: Ka kynhun ialehkai Football jong ka Meghalaya kala mih hynne ka sngi Nyngkong ban leit iashimbynta ha ka Senior Men’s National Football Championship jong ka Santosh Trophy 2024-25 kaban long ha Hyderabad mynta ka taiew.
Ka Meghalaya kala ngat haka Group B kaba kynthup ia ka Goa, Delhi, Kerala, Tamil Nadu bad Odisha bad kan iakhun nyngkong pyrshah ia ka Tamil Nadu ha ka 15 tarik u Nohprah ha ka por 2:30 mynsngi ha Hyderabad’s Deccan Arena.
Ki 4 tylli ki kynhun kiba khur bun point na ki ar tylli ki Group kin ioh rung sha ka Quarterfinals bad ka Meghalaya, ka don iaka jingthrang ban ialehkai khambha ban ia u snem 2022-23 ha kaba kala wan ba-ar da ka jingshah pynrem noh ha ka Karnataka.
Ka kynhun ialehkai ka Meghalaya kala ioh rung sha ka Final Round hadien ba kala long ka lahduh ha ka Group E ha kaba ka la jop ia 2 tylli ki jingiakhun bad kala iakhaid noh bad ka Assam ha u bnai ba la dep.
U Bah Hering Shangpliang yn bteng ban ialam ia ka kynhun ialehkai ka Meghalaya bad ia kane ka kynhun ialehkai yn ialam da u Fullmoon Mukhim kum u kapten.
Hynne ka sngi, la pynlong ia ka jingialang ban kitbok kitrwiang ia katei ka kynhun kaba la mih noh na ka jylla, ha kaba ka Meghalaya Football Association hapoh ka jingialam u President u Bah Hamlet Dohling, u General Secretary Bah Sunesh Syiem, u Vice-President Bah Cliff Nongrum bad u Treasurer Bah Prosper Warjri.
“Ka long ka burom ia phi ban mihkhmat ia ka jylla Meghalaya,” la ong u Bah Dohling ia ka kynhun ialehkai, “Phi ioh ia ka jingkyrshan naka jylla baroh kawei bad ngi don ia ka jingshaniah kaba skhem ha phi. Phi lah ialehkai bha haka First Round ha Assam bad mynta ngi ngeit ba phin sa poi shaduh ka Final. Ngim kwah ia phi ba phin shu ialehkai bha hynrei ngi kwah ba phin da jop syndon. Balei ngim lah ban jop? Phi lah trei shitom bha bad lada phi iai neh ha ka jinglong ryntih bad ka jingiatreilang kum ka kynhun, kam don kano kano ka daw kaba ngim lah ban jop ia katei ka khusnam”.
Katba u Bah Syiem, ula ong, “Ngi la iohi iaka jingialehkai naduh mynsiem ka jong phi bad phi lah trei shitom bha. Phi donkam ban pynneh ia katei ka rukom ialehkai bad na ka MFA ngi don ia ka jingshaniah kaba skhem ha phi”.
Ki nongialehkai ka Meghalaya ki kynthup ia u:-
Goalkeepers – Siwel Rymbai, Rajat Paul Lyngdoh, Lambhamiki Lamare
Defenders – Wanboklang Lyngkhoi, Aibiangmame Nongneng, Donborlang Nongkynrih, Overkindness L Mawnai, Badondor Marbaniang, Banraplang Pyngrope, Arlangky Nongsiej
Midfielders – Baiaikara Swer, Wilbert Marbaniang, Fullmoon Mukhim (C), Damanbhalang Chyne (VC), Fairming Suting, Dibormi Kassar, Kevin Rymbai, Robertson Khongriah
Forwards – Donlad Diengdoh, Deibormame Tongper, Khrawkupar Jana, Owanijuh Pajuh
Support staff – Hering Shangpliang (Head Coach), Dapmon Tariang (Assistant Coach), Amit Rai (Goalkeeping Coach), Freddy Kharpran (Manager), Baiainehlang Bareh (Physio) bad Teiborlang Dohling (Official).
Ki sngi ialehkai
Ka Meghalaya bad ka Tamil Nadu, ha ka por 2:30 mynsngi ha ka 15 tarik u Nohprah
Ka Meghalaya bad ka Kerala, 7:30 mynmiet haka 17 tarik u Nohprah
Ka Meghalaya bad ka Delhi, 2:30 mynsngi ha ka 19 tarik u Nohprah
Ka Meghalaya pyrshah ia ka Goa, 2:30 mynsngi ha ka 22 tarik u Nohprah
Ka Meghalaya bad ka Odisha, 9 mynstep ha ka 24 tarik u Nohprah.
