Shillong, Risaw 29: U Myntri Khynnah ka Sorkar Pdeng ba khmih iaka tnat kam bar ri u Pabitra Margherita hynne ka sngi u aiti ia ka shithi thungkam sha ki 207 ngut ki nongioh kam ha ka jingialang jong ka Rozgar Mela kaba la pynlong da ka tnad Post, North East Circle.
U Pabitra Margherita u la aiti ïa ki shithi thungkam sha ki 191 ngut ki nongtrei ba thymmai ha ka tnat Postal, 15 ngut ha ka Railways bad 1 ha ka NIT Meghalaya.
Ha ka Rozgar Mela kaba la pynlong ha Shillong, da ki spah ngut ki samla kiba la shah thungkam thymmai na Meghalaya, Manipur, Nagaland, Mizoram, Tripura, bad Assam ki la ïalum lang ban rakhe ïa kane ka mawjam, kaba pyni ïa ka jingshimkhia jong ka Sorkar Pdeng ban kyntiew iaka iohkam iohjam iaki khun samla.
Haba kyntu ïa ki samla ban aiti lut ha ka jingshakri jong ki hala ki kam, u Myntri Khynnah u la ong, “Kane ka sngi kam dei shaphang ka jingkheiñ jingdiah, ka dei shaphang jong phi. Phi dei ki nongmihkhmat jong ka jingthmu ka Sorkar jong ngi na ka bynta ka ri India. Ka jinglong ba janai bad ka jingaiti jong phi kan long ka nongrim jong ka jingroi ki jaitbynriew jong ngi”.
Ia kane ka Rozgar Mela la pynlong ha ki 40 tylli ki jaka ha ka ri India ban sam ia ki shithi thungkam sha ki samla ba dang shu shah thungkam ha ki tnad bapher bapher jong ka Sorkar Pdeng, kynthup ia ka tnad lum khajna, ka tnad pule puthi, ka tnad kam pohiing, ka tnad iada ri, bad ka tnad jong ka koit ka khiah nalor kiwei kiwei de.
Ha kane ka sngi, u Myntri Rangbahduh ka ri u Narendra Modi u la sam palat 51 hajar tylli ki shithi thungkam lyngba ka video conferencing.
Haba kren bad ki lad pathai khubor, u Margherita u la ong “Nga sngew sarong ban ïohi ba da ki spah ngut ki samla kiba jop ki la ïalum lang, kiba kwah eh ban pdiang ïa ki kam thymmai jong ki. Ka pyndap ia nga da ka jingkmen ban sakhi ia ki kyrtong kiba pynpaw ia ka jingsngewnguh ia ka jingpyrshang jong ka Sorkar”.
“Ym tang kum u Myntri hynrei kum u nongshong shnong ka ri India, nga sngew sarong shibun ban sakhi ia kane ka jingkiew ha New India, katba ngi iaid sha ka lynti jong ka roi ka par” u la ong.
U Margherita u la ong ba ka Rozgar Mela ka pynpaw ïa ka jinglong nongïalam ba don jingïohi jngai jong u Myntri Rangbahduh ka Ri u Narendra Modi, uba ka jingbuddien jong u ïa ka Atmanirbhar Bharat ka pynkhih ïa ka jingïaid lynti jong ka roi ka par jong ka India.
