Nongpoh, Nailur 09 : Ka Khasi Students’ Union (KSU)-North Khasi Hills ryngkat ki bor district ka Ri-Bhoi, ha ka sngi Balang, kila hiar jurip lang ia ka Facilitation Centre ha Umling, hadien ka rai ka Sorkar ban sdang pyntreikam noh ia ka centre hapoh u bnai Nohprah mynta u snem.
U Chief Secretary ka Jylla Dr Shakil Ahammed ha ka jingiakynduh bad ki nongialam ka KSU hynnin ka sngi Ba-ar, ula pyntip baka Sorkar kan pyntreikam noh ia ki Facilitation Centre ka MRRSA ha Umling bad Ratacherra hapoh ka taiew ba khatduh u Naiwieng lane taiew ba nyngkong u Nohprah.
Ka jingjurip hynne ka sngi ka long ruh ban leit peit ia ki jingpynkhreh ia ki jingtei bad ki jingdonkam jong ka Facilitation Centre bad ka jingshna ia ka Food Court ha kane ka Centre.
Haba kren sha ki lad pathai khubor hadien ka jingjurip, u President ka KSU-NKH Bah Ferdynald Kharkamni ula pynpaw ia ka jingbym hun ia ka rukom pynbeit ia ka jaka treikam jong ka Facilitation Centre.
“Ngim sngewhun satia ban iohi ba ki jaka treikam jong ka Facilitation Centre kaba dei ban talasi ia ki kali ba rung sha Jylla, ki long kiba la tei pynrit katba ia ka Food Court lah tei da ka kamra kaba heh” ula ong.
U Bah Ferdynald u la pynpaw ba ka KSu kam pyrshah ïa ka jingtei Food Court lane ban wan rah ïa ki lad ïohkam ïohjam na bynta ki samla, hynrei ka pyrshah ïa jingpynkylla dur ïa katei ka jaka bad ka jingpyrshang ban tei pat da ha kawei ka bynta ka bym ïahap bad ka jingthmu jong katei ka jaka.
“La plie ia ka Facilitation Centre ha u 2020 da ka jingthmu ban pynkhlain ia ka jingpyrrkhing ia ka rung ka mih ki briew kiba wan na shabar ka Jylla. Ngi sngewduh mynsiem ban iohi ba ki jaka treikam ne ki counter jong ki Tnad Sorkar ki long kiba rit, katba ka Food Court pat ka dei kaba heh” ula ong.
“Ka KSU ka ieng skhem ha ka nongrim ba ka Facilitation Centre ka dei ha ka jingshisha ban don ia ki jaka treikam kiba kylluid jong ki tnad sorkar kat kum ka ain Meghalaya Residents Safety and Security Act (MRSSA) 2016” ula bynrap.
Namar kane, u Bah Ferdynald ula dawa ia ka Sorkar ba kan bishar bniah ia ka rukom pyniaid bad rukom pynbeit ia ka jingtei ha katei ka jaka khnang ba yn lah ban pyntreikam hok ia ka MRSSA kat kum ka jingthmu jong ka.
