Shillong, Nailur 09 : Ki nongshongshnong jong ki lai tylli ki shnong kiba don ha khappud ka Meghalaya-Assam ha West Khasi Hills, kila kynnoh ba ki briew na Assam kila pynbor ia ki ban pynrung kyrteng ha ka khana samari, kaba pynlong ia u MDC shimet na Rambrai, Bah Lurshai Kharbani ban phah tuklar mardor ha ka Sorkar Jylla.
U Bah Lurshai, uba la iakynduh ia u Symbud Myntri Rangbah ba khmih ia ki kam Pohiing (Police) Bah Prestone Tynsong ha ka sngi Balang, ula ong ba ki shnong kiba shah ktah ki dei ka Kampaduli, Noapara bad ka Bangjen.
U MDC ula kynnoh ba ki briew ka Sorkar Assam kila wan iuhkjat man ka por ha ka thain bad kila pyndik bha ia ki nongshongshnong.
“Ki briew na Assam kila wan ban pynbor ia ki briew jong ngi ba kin pynrung kyrteng ha ka khana samari ka Assam. Ki briew jong ngi kila kren sha phi ba kim kwah ban don hapoh ka Assam namar kila dep ban pynrung kyrteng ha ka khana samari ka Sorkar Meghalaya” ong u Bah Lurshai.
Ula ong ba ki nongshongshnong kila dep iakynduh ia u Deputy Commissioner bad u Superintendent of Police ka West Khasi Hills hashuwa ba kin wan iakynduh ia u Symbud Myntri Rangbah.
U Bah Lurshai ula iathuh ba ula kyrpad ia ka Sorkar ban buh noh mardor ia ka ktem pulit ba shipor ha ka thain khnang ba ki nongshongshnong kin sngew shngain.
“Ngi kyrpad ban buh ia ka ktem pulit ba shipor khnang ba ki briew kin sngew shngain bad ioh jingiada na ki bor ba nabar” ula ong.
Ula iathuh ruh ba u Symbud Myntri Rangbah ula kular ba un sa iakren bad u Chief Secretary ka Assam ban pynbeit noh ia kane ka jingiakajia.
U bynrap ba ka Sorkar kala kular ba kan sa shimkhia bha halor ka jingtyrwa ban buh ia ka ktem pulit ba shipor ha ka thain.
