Shillong, Nailur 09 : Ka Amendment Rules jong ka Meghalaya Identification, Registration (Safety & Security) of Migrant Workers Act mynta kan ai ia ka jingpynsajia kaba tyngeh, da ka kuna kaba kot haduh T.1 lak bad ka jingshah set phatok ia kiba pynkhein ain bunsien, ong u Principal Secretary Bah Frederick Roy Kharkongor ha ka sngi Balang.
Haba kren ha ka jingpynlait ia ka MIRSS Amendment Rules, 2026, u Bah Kharkongor ula iathuh ba sa hynriew tylli ki rules la bynrap biang ban ai kham bun ka bniat ha ka jingpyntreikam ia ka Act.
“Ngi la ioh ia ka jingmynjur u Lat dang ha ka 11 tarik Lber, 2026. Kila don shibun ki jingiasyllok bad kam dei ka kam kaba suk. Ngi la iakynduh ia u Lat la bunsien ha ka kyrdan jong u Myntri Rangbah, Myntri Sorkar, Chief Secretary bad ki Ophisar. La mynjur ia ka ha ka 13 tarik Lber bad la wanrah hapoh ka jingialang ka Kynhun Myntri ha ka 26 tarik Lber” ula iathuh.
U Bah Kharkongor ula ong ba ki hynriew tylli ki rule ba thymmai ki batai shaphang ki Ophisar kiba lah ban pyntreikam ia ka Act, ka bor jong ki, ki kyndon na ka bynta ka jingpynrung kyrteng, ki Ophisar bala ai jingbit ban pyntreikam, ka jingbuh ia ka kuna, bad ka jingpynkylla ha ka registration form.
“Hashuwa, ka Act bad Rules kim don satia ia ka dohksah ban pynthikna ia ka jingpyntreikam thikna. Mynta, da kine ki rule thymmai, la ai kham bun ki bniat ban lah pyntreikam bha bad la aibor kham bun sha ka jingpyntreikam ia ka” ong u Bah Kharkongor.
Halor ki kyndon dain kuna, ula ong “Haba nyngkong ka don tang kawei ka jingbuhdor. Mynta ngi la wanrah ia ka jingduna kuna kaba heh ban phah ia ka khubor kaba dei sha ki nongpynkhein ain. Na ka bynta kito kiba pynkhein nyngkong, ka kuna kan long T.10,000, ia kiba pynkhein arsien kan long T.25,000 bad ia kiba pynkhein laisien bad bun eh, ka kuna kan long T.1 lak nalor ka jingshah set phatok ba lai bnai”.
U Principal Secretary ula ong ruh ba ka Tnad Labour kala pyndonkam ia ka technology, ha kaba ki Pulit kin pynshisha ia ki nongbylla bar jylla lyngba ka Crime and Criminal Tracking Network System (CCTNS) bad ia ka kuna yn hap ban siew lyngba ka digital payment gateway.
