Shillong, Naiwieng 17: Ka kynhun ialehkai kriket ka Meghalaya ka la lah ban tam da kumba 250 ron pyrshah ia ka Manipur, ha ka lympung ialehkai ka Ranji Trophy 2025-26, kaba la jam sha ka sngi kaba ar jong ka jingiakhun kaba la long ha sorbah Surat mynta ka sngi.
Ka Manipur ka la lah ba kan kamai mynta 180 ron hadien ba ka la hap noh 4 wiket, kaba long hadien ba ka Meghalaya ha ka pali wan tied ba nyngkong ka jong ka, ka la lah ba kan kamai haduh 430 ron hadien ba ka la hap baroh ki wiket.
Ka khana jong ka sngi kaba ar hi ka long ba ka Meghalaya kaba la lah lypa ba kan kamai 359/5, ka la lah ba kan kamai sa kumba 71 na ki san wiket kiba dang sah ki jong ka, kaba la wan hadien ba u Kush Agarwal bad u Swastic Chettri, kiba long ki arngut ki batsman ba la wan bteng ia ka pali ka jong ki, ki la out noh hadien ba ki la lah ban kamai 34 bad 18 ron, katba u Aryan Borah u la lah ban kamai 23 ron.
Na ka liang ki nong kawang bol jong ka Manipur, u Johnson Singh (2/34), Ajay Singh (2/51), Jotin Pheiroijam (2/58) bad Bishworjit (2/77), ki la ioh ban khur mar ar wiket.
Haba la wan ban sdang pat ia la ka pali wan tied ba nyngkong, ka Manipur, ka la shem jingeh bha hadien ba ka la lap ba hap noh 4 wiket naka bynta 93 ron, pynban ka jingkamai ron paralok kaba 82 ron naka bynta ka wiket kaba saw hapdeng u AL Bashid (52 not out) bad u Priyojit (49 not out), ki la dem iakhun tyngeh tad haduh ban khlem da hap wiket shuh haduh ba kut jong ka sngi.
Na ka liang ki nong kawang bol ka Meghalaya, kiba la ioh ban khur ia kine ki saw wiket ba la hap ka Manipur ki long u Akash Chaudhary (1/30), Chengkam Sangma (1/31), Aryan (1/34) bad Swastic (1/47).
