Shillong, Naiwieng 17: Ka Meghalaya ka la jam sha ka phainal jong ka lympung State A Trophy 2025-26, hadien ka jinglah ban pynliem ia ka Mizoram da 23 ron ha ka jingiakhun ba long ha Chandigar.
U namtam ha kane ka jingiakhun dei u Dipankar Baruah uba la lah ban kamai 101 ron bad iai neh haduh kaba kut (not out) bad u Md Ashif Khan u la lah ban kamai 72 ron bad kane ka la biang pura ia ka Meghalaya ba kan hur ia ka jingjop kaba san sien lynter ka jong ka, katba ka Mizoram kaba wan ba-ar na kane ka thup, kan dei ka namrem ba nyngkong ka jong ka ba kan mad ha kane ka lympung iakhun.
Haba phai sha kane ka jingiakhun, ka Meghalaya hadien ba ka la jop ia ka jingkynting pisa (toss) ka la kam trai ba kan tied nyngkong, ha kaba ka jingiakhun la hap ban pynhiar noh sha ka 44 over na ka daw ka jingsngem bad jhieh ka madan.
Hynrei na ka liang ka Meghalaya ka la lah ba kan kamai 217 ron hadien ba ka la hap noh ar wiket, bad ka Mizoram ka donkam 220 ron ba kan beh ia kane ka thong na ki 44 over, kaba long kat kum ka kyndon jingkhein jong ka VJD Method, hynrei ha kaba kut, ka Mizoram ka la lah ba kan kamai 196 ron na ki 41.3 over.
Wat la katta ha kaba sang eh jong ka jingwan beh ia kane ka thong, shipor, ka Mizoram, ka la ioh ia ka jingsdang ba paka hadien ba u Johan u la lah ban kamai 85 ron ba la wan tang na ki 69 tylli ki bol bad Sahil Sharma 66 ron na ki 96 tylli ki bol bad kine baroh arngut ki la seng ia ka nongrim kamai paralok kaba 139 ron naka bynta ka wiket ba nyngkong.
Hynrei shwa ba kine ki arngut kin lah ban lam khmat ia ka kynhun, u Shavian Blah (2/18 na ki 5 overs) ka la plie lad hi war ia ka jingsdang ban khyllem ki wiket ka Mizoram, katno tam lei lei ba ki 10 wiket kiba sah ki la lap ba hap hadien ba la kamai tang 57 ron.
Wat lada u Shavian u la plie ia ka lynti ban pynhap ia ki wiket, hynrei u bowler ba la kham paw naka bynta ka Meghalaya dei u Denikcheng Marak (3/49 na ki 9 overs) bud sa u Chandra Bahadur Thapa (2/33/ na ki 9 over).
Kumta ha kaba kut jong kane ka jingiakhun, kine ki artylli ki jylla kin ia khreh ban ia mih madan ban ia aireng biang hapdeng para maki naka bynta ka phainal kaba la buh ban long ha Mohali ha ka sngi Balang jong ka taiew.
