Haflong, Nailur 15 :Ki jaidbynriew Kuki jong ka Dima Hasao kila rakhe ia ka sngi kaba kthang tam ne ka ‘Kuki Sahnit Nikho’ (Kuki Black Day) ha baroh ki shnong jong ki Kuki ha ryngkat baroh ki Kuki kiba don ha kylleng ka pyrthei, ban dawa pynioh ia ka hok halor ka jingshah pyniap jong ki hajar ngut ki jaidbynriew Jki naduh ka snem 1991 haduh u 1997.
Ia kane ka sngi kaba kthang jong ki jaidbynriew Kuki la rakhe shibynta ban pynpaw ka jingsngewsih kaba khraw halor ka jingshah pyniap jong ki nongshong shnong kiba dei ki jaidbynriew Kuli, bad ban duwai na ka bynta ki mynsiem ki jong ki kumjuh na ka bynta kiba haiing hasem ki jong ki, bad ruh ban duwai na ka bynta ban pynioh ia ka jingbishar hok na ka bynta ka jong ki.
Ha Songpijang, la pynlong ia ka jingialang paidbah hapoh ka phyllaw jong u nongialam ka thain u L. Guite ha kaba la pyniaid da u secretary jong ka shnong u Upa H. Haolai.
Ka jingkren halor katei ka phang la pynsngew da u Pastor H. Changsan uba dei u secretary jong ki Balang Songpijang Fellowship.Nalor kata ula ialam ruh ha ka jingpynlong ia ka jingialang sngewlem nalor ka jingduwai mass.
Haba kren ha ka jingialang, u Changsan ula ong ba ki jaidbynriew Kuki kiba la shah pyniap ha ki ha ki Naga Lim Guard jong ka kynhun seng lehnoh NSCN (IM) naduh ka snem 1991 haduh u 1997 kalong haduh palat 1,000 ngut, kata ha broh ki shnong ba la shong shnong da ki Kuki jong ka Assam, Manipur bad Nagaland.Kito kiba la shah pyniap ha ka 13 tarik u Nailur 1993 kilong haduh palat 100 ngut, kata kham bun hapoh ka shnong Joupi jong ka Manipur.
