Agartala, Nailur 15: Ki nongshong shnong ha ki katto katne ki jaka ha Agartala kim nang ioh thiah ioh dem shuh namar ka jingsyier halor ki kam tuh kam thiem bad ki kam pyntriem kiba ha rukom.
Ki paidbah kim don jingshaniah shuh ha ki pulit na ki bynta ki kam shong shngain ha kaba kila shim ha lade ia ka jingkitkhlieh ban iada ia ki shnong ki thaw ha ki por mynmiet myniong.Ki jingjia jong ki kam pyntriem bad ki kam tuh kam thiem kila wanrah ka jingsyier hapdeng ki nongshong shnong ha Agartala.
Ki bor pulit kila pulom ban buh ia ki paidbah ha ka jingshngain bad kila pulom ruh wat ban ioh kem ia ki nong kam pyntriem bad ia ki nongtuh nonglute.
Na ka liang ki nongshong shnong kila talasi hi ia ki kali bad ki ar shaka kiba iaid ba ieng ha ka por mynmiet ha ki thain ki jong ka nalor ka jingtohkit halor ka leit ka wan ka jong ki ha ka por mynmiet.
Kiba bun na ki kila hap ban leitphai sha la ki jong ki kam ki jam ha ka por mynstep, hynrei ki sngewkmen namar ba katto katne na ki paralok parajor bad ki para marjan kila ioh thiah ioh dem suk khlem da khuslai iala ka jong ka jingtrei shitom kaba ki sngewhun mynsiem.
“Ngi don hapdeng ka jingsyier namar ka jingkiew jong ki kam pyntriem ha ki katto katne ki bynta jong ka Agartala.Ha ka por mynmiet ka kynhun jong ki khynnah samla na ka shnong ka jong ngi kila pynlong da ka jingap pahara ban khanglad ia ki kam pyntriem,” ong uwei na ki nongshong shnong.
“Watla katta, kim shym la don satia ia ki atiar iada kiba biang lait noh tang da ki dieng bad ki nar rod.Hadien habud lada ki iatyngkhuh bad ki runar kiba don da ki tiar pyntriem kum ki suloi bad pistol, kumta kane ka lah ban wanrah ka jingeh kaba khraw,” ong uwei pat u nongshong shnong.
Ki don ki pulit kiba iaid pahara hynrei kam pat biang bad kila la dawa shuh shuh ia ka jingpahara jong ki bor pulit, kata lada long ha ki katto katne ki jaka rung jaka mih ia kaba na ka liang ki bor pulit hi kila pyrshang ban kham pynjur hynrei ka bym shym la pynhun ia ki nongshong shnong.
Kane ka mat kala poi ruh sha ki tyndong shkor jong u Myntri Rangbah (CM) u Dr. Manik Saha uba la ong ba kalong kaba sngew bynniaw halor ka jingkhie rasong jong ki kam pyntriem bad ki kam tuh kam lute.
