Guwahati, Nailur 15 : Khlem da kyrtiang dien ha ka jingiakhun pyrshah ia ki kam bamsap, ka kynhun ki heh sorkar na ka tnat Directorate of Vigilance and Anti Corruption hynnin ka sngi Balang kila ioh ban kem noh ia u assistant Block Development Officer (BDO) cum Secretary jong ka Dhula Gaon Panchayat ha Darrang district ka Assam halor ka jingkynnoh pdiang ia ka pisa bamsap.
Ia une u assistant BDO ba la tip kyrteng kum u Sujit Thakuria la ong ba ula dawa pisa na ka bynta ban pyllait ia ka bill.
Une u ophisar ula shah pynap shrip bad shah kem noh markhmat hynnin ka sngi Balang ha ki heh ka tnat iakhun bamsap katba u dang pdiang ia ka pisa namar ka jingpyllait ia ka running bill kaba iadei bad ka kam kontrak.
Ka tnat Directorate of Vigilance and Anti Corruption ka dang iai bteng ban pynlong ka jingkhynra halor ki kam bamsap ia kiba la aijingtip da ki lanot lane da ki briew kiba bishar bniah halor ki kam bamsap.Kiba bun ki heh sorkar kila shah kem noh markhmat katba ki dang pdiang ia ka pisa bamsap.
Ha kawei pat ka bynta, haba pynpaw lyngba ka twitter, u ADGP (Law & Order) u GP Singh ula thoh, “U Sujit Thakuria, Asstt. BDO-cum-Secretary, Dhula Gaon Panchayat, District Darrang ula shah pynap shrip bad shah kem noh hynne ka sngi da ha @DIR_VAC_ASSAM katba u dang pdiang ia ka pisa halor ka jingpyllait ia ka bill na ka bynta ka kam kontrak.”
“Kham hashwa, ha ka 7 tarik u Nailar ba la dep, ka kynhun na ka tnat Directorate of Vigilance and Anti-Corruption department ka Assam kala kem noh ia uwei u pulit halor ka jingdonkti ha ka kam bamsap.
Ia une u pulit la tip kyrteng kum kum Sabin Pal Das uba dei u Assistant Sub-Inspector (ASI) jong ka Matiya Police Station kaba hapoh Goalpara district ka Assam.
Halor kane u Special DGP Law and Order, u GP Singh ula pynpaw lyngba ka twitter da kaba thoh; “Ngim don jingmap iano iano ruh, wat ia ki bor pulit ka Assam.Mynta ka tnat @DIR_VAC_ASSAM kala kem noh markhmat ia u Sabin Pal Das, ASI jong ka Matiya Police Station katba u dang pdiang ia ka pisa bamsap.
