Jowai, Kyllalyngkot 20: U Myntri Kam Pohiing barim ka jylla Bah Lahkmen Rymbui, hynne ka sngi Saitjaiñ ula kyntu ia ki nongshong shnong ba ki dei ban pdiang ia ka jingbha na ka bynta ka jingkiew irat ka West Jaintia Hills district.
Haba kren kum u kongsan haka jingrakhe iaka Meghalaya Day kaba 52 kaba dei ka sngi kaba ka Meghalaya kala ioh iala ka jong ka jylla, haka jingialang kaba lalong ha District Library Auditorium, Mynthong ba la pynlong da ka ophis jong u Deputy Commissioner, u Bah Rymbui, uba long u MLA ka Amlarem constituency, ula kren shaphang ka jingnohsynniang ia ki nongseng ia ka jylla bad ula kyntu ia baroh ki nongshong shnong ba kin pdiang ia ka jingbha na ka bynta ka roi ka par ha baroh ki liang jong ka district. Ula ai ruh iaki jingtip ia ki kam pynroi bad ia ki jingjop ka sorkar ha ka liang ka pule puthi, ka koit ka khiah bad ki jingtei ia ki jingtei ki bapher.
Ula pynpaw iaka jingkongsan ban kiar naka jingdih ia u drok bad ki jingngop kiba sniew lyngba ka social media bad ula pynshlur ia ki samla ba kin shim kabu ia ki skhim sorkar khnang ba kin ioh jingmytoi.
Ha kane kaj ingrakhe la iadonlang ki Additional Deputy Commissioner kiba kynthup ia F.B Basan bad B.Blah, u Bah C. Syrti u Superintendent of Police ka WJH, u riewpawkhmat ka thaiñ u Bah H.H Mohrmen bad kiwei kiwei.
Ki Additional Deputy Commissioner kila ai ia ki jingbatai kiba bniah halor ki kam pynroi kiba la pyntrei da ki tnad sorkar bapher bapher ha ka District bad la ai ruh ia ka jingbatai kaba bniah ia ka jingiaid lynti ki nongialam ka jylla ha kaban pynioh ia la ka jong ka jylla.
Ha kane ka jingialang la ioh ruh ia ka jingkren na S. Phanbuh, Assistant Commissioner halor ka histori jong ka district katba u Bah H.H Mohrmen ruh ula ai jingkren ha kane ka jingrakhe.
Ha katei ka prokram, la pynkup burom ruh ia ka Reesa EE Christine Suting jongka North Liberty Higher Secondary School kaba la ioh ia ka 11th position ha ka SSLC bad Larisa Lamin jongka Adventist Higher Secondary School, Thadlaskein ba ioh ia ka 1st position ha ka HSSLC – Arts.
La pyniphuh iphieng ia kane ka jingialang lyngba ka jingshad kaba la iashimbynta da ki dkhot jong ka Seiñ Raij Jowai bad ki dkhot jongki Self Help Group.
