Shillong Nailur 02: U Symbud Myntri Rangbah ka jylla u Bah Prestone Tynsong hynne ka sngi ula plie iaka jingrakhe Foundation Day jong ka Mawkhar Christian Higher Secondary School kaba la dap 131 snem ha kaban shakri iaka imlang sahlang ban pynnang pynstad iaki khynnah.
U Bah Prestone Tynsong haba kren kum u Kongsan ha ka jingialang, u la ong, “Nga long kumne kumba nga long mynta ka dei namar jong ka skul Mawkhar Christian namar nga la ioh iaka jingnang jingstad bad pyndep iaka jingpule ka jong nga na kane ka skul ha u snem 1983 bad haduh mynta u dang iai kynmaw ieid ia kane ka skul ryngkat bad ia ki nonghikai kiba ju ai jinghikai watla kim don shuh ha kane ka sla pyrthei”.
U la iathuh ba ha ki snem kiba mynshwa ka Skul Mawkhar Christian kadei kaba pawnam bha bad kala sei ia bun ngut ki briew kiba shemphang kiba trei ha ki lain bapher bad kila noh synniang shi katdei iaka imlang sahlang bad iaka jylla.
U la kyntu ia ki khynnah skul bad ia ki nonghikai ba ki dei ban trei shitom ban wanrah biang iaka nam bad ka burom jong ka skul Mawkhar Christian namar ha ki por kiba mynshwa bun ki khynnah jong kane ka skul ki ju wan shakhmat ne wan ha ka Top Ten ha ka eksam Matric kaba pynlong da ka MBoSE.
“Kum u khynnah skul uba rim ryngkat bad kiwei pat ki paralok kiba ia leit skul lang, ngin sa ia lum ia u synniang bad ngin noh T.10 lak sha ka skul, hynrei kum u Symbud Myntri Rangbah ka jylla ngan sa shimkhia ban iakren bad ka sorkar ban leh eiei na ka bynta kane ka skul kaba la ai ka jingshakri iaka jylla ha ka pule puthi” ong u Bah Prestone.
Ha kane ka jingrakhe, u Bah Prestone Tynsong ryngkat ka jingdonlang u MLA ka North Shillong Constituency u Bah Adelbert Nongrum, kila pynkup burom ia ki khynnah kiba la pass bha haka eksam SSLC bad HSSLC bad kila pynkup burom ruh iaki nonghikai kiba la hikai palat iaka 25 snem.
Ha kane ka jingialang la ioh ruh iaka jingkren na u Bah Adelbert Nongrum, u Principal ka MCHSS u Bah AH Nongbet, ki dkhot ka Managing Committee bad kiwei kiwei kiba la shah khot sngewbha.
La pyni ruh ia ka phlim kaba lyngkot kaba batai bniah iaka jingiaid lynti jong ka skul Mawkhar Christian bad la pyniphuh iphieng ia kane ka prokram, da ki khynnah skul naduh kiba rit haduh kiba heh, kiba la iashimbynta ha kaban shad bad rwai kiba la pynsngewtynnad ia baroh.
