Shillong, Nailur 02: Ki nongshad ka jylla kiba don hapoh ka lama jong ka All Meghalaya Dancers Association (AMDA) ha ka sngi Thohdieng, kila kyntu ia ka sorkar jylla ban ai jingiarap pisa bad ban bhah tyngka lem na ka bynta ban shna iaka Dance Institute ha ka jylla.
U President ka AMDA u Bah Kitbok Thabah haba iakren bad ki nongthoh khubor, u la ong, namar ka jingduna palat ha kaban ioh jingiarap pisa na ka sorkar jylla, kiba bun ki samla kiba tbit ban shad kim shym la ioh iaka lad ban iashimbynta ha ki jingiakob shad kiba long hapoh jong ka Ri India ne wat shabar ri.
U la ong, ka Association na ka por sha ka por, kala pan jingiarap naka sorkar bad kala leit ruh ban iakynduh ia u Myntri Rangbah ka jylla u Conrad Sangma ban pan jingiarap khnang ba yn lah ban kyntiew bad pynshlur ia ki samla ka jylla ba kin pyni iala ka sap ka phong.
“Ngi la kyntu ia ka sorkar ban ai jingiarap pisa iaka Association ban shna iaka Dance Institute ban ai jinghikai bad ban pynshlur ia ki samla ka jylla ba kin leit iashimbynta ha ki rynsan iakob ki bapher haka National bad International” ong u Bah Thabah.
