Williamnagar, Nailur 01: Ka sor Williamnagar kala shongshit ha ka jingrakhe bad da ki hajar ngut kila ialum ha ka madan jongka Rongrenggre ban rakhe ia ka lyngkhuh sngikha kaba 78 jong u (L) P.A. Sangma bad ia ka jingdap 13 snem jong ka seng National People’s Party (NPP).
Ha kane ka jingialang la wan ban iashimbynta da ki briew na kylleng ka thain shatei lammihngi bad na kiwei kiwei ki jylla ban ai burom ia u nongialam uba la khlad noh.
Ha kane ka sngi la sdang ia ka prokram da kaba pynlong ia ka jingiakob rwai, la pyllait paidbah ia ka kot lyngkdop ne ka coffee table book bad ka jingplie ia ka P.A. Sangma Photo Gallery.
Hadien kane la pynlong ia ka jingialang ha ka por 1 baje mynsngi da kaba rwai ia ka jingrwai Oh Ang Aman Asong kaba la thaw da u Beston Momin, kaba la pynwandur thymmai biang da ka kynhun tem ba pawnam ka rilum Garo ka Nokpante— ia kaba la shim ba kadei ka ‘Anthem’ jong ka NPP ha rilum Garo.
Kala don ka jingbuh syntiew kaba la ialam da ka kurim jong u (L) PA Sangma ka
Soradini K. Sangma, ha ryngkat ka jingdonlang u Nongialam ba ha khlieh ka NPP u Conrad K Sangma uba long ruh u Myntri Rangbah ka jylla u Conrad K. Sangma bad kiwei kiwei ki heh ki hain.
La ai ia ka jingkren pdiang sngewbha da u myntri ka sorkar jylla u Marcuise N. Marak.
Ha kane ka sngi, palat 300 ngut ki dkhot na ki seng sain pyrthei ki bapher bapher kiba la wan pyniasoh sha ka seng NPP kila shah pynkup burom, katto katne ki nongialehkai na rilum Garo kila ioh pdiang ia ka khusnam P.A. Sangma Achievers’ Award. Nalor kane la ai ruh ia ka khusnam kaba kyrpang ia ka Soradini K. Sangma bad ia kiwei kiwei kiba kynthup ia Sonelal Kol, N.K. Gauri bad Breston Momin, kiba la leh ia ka bynta kaba khraw ha kaban pynwandur ia ka seng ha ki por ba la thaw ia ka.
Kane ka jingrakhe kadei ruh ka dak jong ka jingplie ia ka P.A. Sangma Museum Arena da u Myntri Sorkar u Marcuise Marak bad ha kane ka museum, la pyninam shaphang ka jingim, ka nongrim bad ka jingshemphang jong u nongialam ba la khlad noh, da ka jingthmu ban ai mynsiem ia ki samla bad ia kiba la heh la san ha ka rta.
U Myntri Rangbah u Conrad K. Sangma kham hadien, ula leit ban jurip ia katei ka museum bad ong ba kadei ka jingai kynmaw burom kaba khraw ia u kpa jongu ha ka jingiaid lynti kaba sahnam ka jongu.
Bun ngut ki heh ki hain kila ai jingkren ha katei ka jingialang bad pynkynmaw ia ka por kiba la leit bad ia ka jingkhraw ka nam jong u PA Sangma.
Thangwang Wangham, State President ka Arunachal Pradesh NPP, ula ong ba u PA Sangma udei u nongialam ba shisha jong ka thain shatei lammihngi bad ula kyntu ba dei ban nang pynkhlain ia ka seng.
U MP ka Rajya Sabha u Dr W.R. Kharluki ula pynkynmaw ia ka jingsngewkhia u PA Sangma na ka bynta ka bha ka miat jong ki paidbah bad ka jingiadei kaba iajan bad pulit kiba ai jingiada ia u.
U Symbud Myntri Rangbah ka jylla u Bah Sniawbhalang Dhar ula pynpaw ia ka jingbynniaw ba ym shim la ioh ia ka lad ban iatrei ryngkat bad u PA Sangma hynrei ula iaroh pat ia ka jingiohi jngai ka jongu kaba iai bteng ban pynwandur ia ka jylla Meghalaya.
U Lamphang ka Meghalaya Legislative Assembly, u Thomas A. Sangma, ula pynpaw ba u P.A. Sangma ula trei borbah khlem shongthait na ka bynta ki jaidbynriew riewlum, kiba dang bat ia la ka tynrai bad ki jaidbynriew kiba la shah iehbein.
U National Working President ka NPP, u James K. Sangma, ula pynpaw ia ka jingsngewnguh ia ki nongialam na kylleng ka thain kiba la wan ban iadonlang bad ula ong ba kane kadei ka jingai burom kaba kordor tam ia u nongialam.
U Myntri Rangbah u Conrad K. Sangma, ula pynpaw ia ka jingshem shimet ka jongu ha ka jingleit synran ia la u Kpa ha ka por ba ki dang sdang ban thaw ia ka seng hapoh ka jylla Manipur. Ula pynkynmaw kumno ba u kpa jongu u don ia ka jingngeit kaba skhem, wat haba ula sakhi ia ka jingthylli jong ka jaka pynlong jingialang, ula pynkylla ia ka jingtynjuh sha ka kabu.
“U long u briew u bym shah ktah eiei ha ki jingtynjuh bad u dap kyrhai da ka jingmut kaba bha” ong u Conrad bad ka iaroh ia ka jinglong nongialam u kpa ba ka seng NPP kala kiew kumba ka long mynta.
Haba kren pynkut u Conrad ula pynpaw ia ka jingmut jong ka kyrteng u kpa, Purno kaba mut “pyndep pura” bad ong, “Hooid ula im ia ka jingim kaba pura bad kaba don jingmut”.
 P.A. Sangma bad ia ka jingdap 13 snem jong ka seng National People’s Party (NPP).){kind=link}