Shillong, Naitung 17: Ka skulbah NEHU hynne ka sngi kala kynmaw iaka jingdap 188 snem ka sngi iap U Tirot Sing Syiem haka jingdon lang u Vice Chancellor (VC) u Prof. Prabha Shankar Shukla, ka Amena M Passah naka tnat pule History lem bad kiwei ki nonghikai bad ki samla pule.
Haba kren ha kane ka sngi ka Prof. Passah kala ong “Kawei ka jingdkoh haba iadei bad History jong ka ri India ka long ba ka History kala leh klet iaka History jong ka thain shathei lammihngi khamtam haba iadei bad ki kam len ialade ki rangbah bad ki longkmie namar ia kine la pynjah ruh ha ki kot pule”.
Kala iaroh iaka sorkar pdeng kaba la shim khia ban pynshai paidbah lyngba ka Azadi ka Amrit Mahotsav programme haba iadei bad ki kambah ba ki riewkhraw ka jylla bad ka thain sharthei lammihngi ki leh naka bynta ka thain bad ka ri India baroh kawei.
Kala ong ba ka sorkar Meghalaya kadei ban kynmaw iaka jinglah u Prof David Syiemlieh ban wad bniah halor ki kambah U Tirot Sing u bala khlad haka 17 tarik Naitung hapdeng ka jingshah set byndi.
Ka Prof Passah kala pynkynmaw ruh halor ki jingwad bniah halor ki kiwei riewkhraw ka jylla namar ki kot pule hapoh ka jylla haduh mynta kim shym la thoh shaphang jong ki.
Kala kyntu iaki nongwad bniah bad iaki samla pule ban bteng iaka jingwad bniah khamtam halor ka jingim U Tirot Sing ha nongbah Dacca haka por ba u dang shah set byndi.
Naka liang u VC ka skulbah NEHU u Prof PS Shukla ula ong ba kala dei ka por iaki samla pule ban tip bniah shaphang ki riewkhraw ka jylla bad ka ri India baroh kawei.
“Ka long kaba donkam ban wad bniah shuh shuh halor kine ki riewkhraw kiba ki kambah jong ki ki long ki jingsneng namar ia kine ki kam jong ki la shah kyntait ka ki kot pule” ula ong.
U Prof. Shukla ula iathuh baka skulbah NEHU ka don hapdeng ka jingwad bniah iaki kambah jong ki reiwkhraw jong ka jylla bad naka liang ka skulbah kan iai bteng ban pynlong ki jingpynshai paidbah halor kine ki riew khraw.
Ula kyntu iaki samla pule tnat ka History, Archaeology bad Anthropology ban pynlong shuh shuh ki jingwad bniah halor ki riewkhraw ka jylla ban pyntip paidbah shaphang jong ki lyngba ki ki jingpynshai paidbah.
Pule ruh: Kyntu u DC ia ka ACHIK ban weng noh ia ka jingshah jingit ba mut wan Tura u CM
