Shillong, K’lyngkot 21 : Ka Jylla Meghalaya hynne ka sngi saitjain, kala rakhe ia ka lyngkhuh snem ba 51 ka jingioh iala ka jong ka Jylla, ha ka jingialang bala pynlong ha U Soso Tham Auditorium, Shillong.
Ia kane ka jingrakhe la pynshongkun da ka jingiadon ryngkat u Lat ka Jylla Brig (Dr) BD Mishra (Retd) kum u kongsan bad u Chief Secretary ka Jylla Bah D.P.Wahlang kum u kongsan symbud.
Haba kren ha ka jingialang, u Lat ula ai khublei ia baroh ki nongshongshnong ka Jylla bad ong ba ka dei ka jing sarong bad jingkmen ban iadon bynta ha kum kane ka sngi ba kmen.
Haba pynkynmaw ia 51 snem mynshuwa, ka Myntri Rangbah (Bam Kwai ha Dwar U Blei) Indira Gandhi, kala pyniaid ia ka jingialang ba sah khana pateng la pateng halor ka jingpynkha ia ka Jylla Meghalaya ba pura ha madan Polo, Shillong. Ula ong “Kane kala pynurlong bala slem bha ia ka jingangnud jong ki paidbah ka Ri-lum Khasi, Jaintia bad Garo”.
U Mishra ula ong ba ka jingiakhih dawa Jylla Meghalaya ka dei kaba don hok bad kaba la iakhih khlem sangeh bad wat hapdeng shibun ki jingeh, ka jingiatylli jong ki Nongialam ba iohi jngai bad ka jingangnud jong ki paidbah ban ioh jingithuh iala ka riti ka dustur, kala pynioh ia kane ka Jylla ba itynnad kaba ngi khot ka lajong.
U Lat ka Jylla ula kynmaw burom ruh ia ka jingaiti jong ki Nongialam barim kum u Bah BB Lyngdoh, Bah Edwin Bareh, Captain WA Sangma, Bah HS Lyngdoh, Prof GG Swell, Bah Stanley Nichols Roy, Bah H Hynniewta, Bah Wilson Reade, Prof RS Lyngdoh bad kiwei kiwei, ban iada iala ka tynrai, ka jaka, ka deiriti, ka ktien ka thylliej bad ka hok ban synshar dalade ialade. Ula ong ba dei namar ka jingiohi jngai jong ki bad ka jingiakhih ba khlem sangeh ba mynta ngi la ioh iala ka jong ka Sorkar ban pynurlong iala ka jong ka jingthrang jingangnud.
U Lat ka Jylla ula ong ruh ba ha kine ki 51 snem bala leit noh, ka Jylla kala nang kiew ha ki kam rep kam riang, kam jngohkai, kam pynmih bording, ka pule danglem ki kot ki bor ka juk bad ka jingpyndonkam ia ki marpoh khyndew haba ban jur ba ka jingkut jingmut jong ka Sorkar ban pyndonkam bha ia ka spah ka Jylla bad pynkhlain ia ki bor sorkar kan lah ban pynlong ia ka Jylla kum ka nuksa jong baroh ki kam pynroi.
U Lat ula ai khublei ruh ia baroh kiba iohpdiang ia ka khusnam Meghalaya Day Excellence Award halor ka jinglah jong ki ban shakri bha ia u paidbah bad aiti ruh ia ka khusnam sha ki 18 ngut ki Nongtrei Sorkar nalor ka jingsam khusnam sha ki nongjop ha ka jingiakop Meghalaya Day Run bala pynlong da ka Directorate of Sports & Youth Affairs.
Ha kane ka sngi, la pynbna ruh ia ka kyrteng jong ki briew kiba ioh pdiang ia ka Meghalaya Day Award 2023 kiba kynthup ia I Kong Sweetymon Rynjah iba ioh ia ka Tirot Sing Award, Dr Jennifer V Basaiawmoit iba ioh ia ka Pa Togan N Sangma Award bad u Klingson D Marak uba ioh ia ka Kiang Nongbah Award.
La pynbna ruh ia ki kyrteng jong ki Pulit kiba ioh pdiang ia ka Governor Police Medals jong u snem 2023 kiba kynthup ia u Additional Superintendent of Police Shabbir Sayeed Dkhar, MPS, Deputy Superintendent of Police (DSB)Vincent Nengminza Sangma, MPS, UBSI Iailamlang Iongi Jyrwa, UBSI Sean Stanford Lywait, WPSI Renu D Momin, Havildar Mewan Roy Pakma, Havildar Amplias Synnah, BN/975 Alphonse Lyngdoh bad Fireman Pyarson R Marak.
